Anglııa shirkeýin alǵash ret áıel basqardy

ASTANA. KAZINFORM — Bul Anglııa shirkeýi tarıhyndaǵy jańa kezeńdi bildirip otyr, dep habarlaıdy Kazinform menshikti tilshisi.

63 jastaǵy Sara Mallallı Kenterberıı jańa arhıepıskopy bolyp taǵaıyndaldy, ol 106-shy arhıepıskop jáne Anglııa shirkeýi tarıhyndaǵy osy laýazymdy atqarǵan alǵashqy áıel boldy. 

Djastın Ýelbı hrıstıan ýaǵyzdaýshynyń jasóspirimder men jastarǵa qatysty jynystyq álimjettik, zorlyq-zombylyq kórsetýi týraly tergeýdi durys júrgizbegeni úshin synǵa ushyraǵan soń otstavkaǵa ketkennen keıin bul qyzmette bir jylǵa jýyq ýaqyt eshkim jumys istegen joq.

Malallıdiń kandıdatýrasyn brıtandyq MI5 qaýipsizdik qyzmetiniń burynǵy basshysy Djonatan Evans basqaratyn Kandıdattardy usyný komıteti maquldady. Dástúr boıynsha, komıtettiń sheshimin monarh bekitedi.

Resmı túrde Anglııa shirkeýiniń basshysy korol bolǵanymen, Kenterberı arhıepıskopy onyń rýhanı jetekshisi bolyp sanalady. Ol eń joǵary epıskoptyq kyzmette bolyp, 165 eldegi shamamen 85 mln dinge senýshini biriktiretin búkil ǵalamdyq Anglıkan qaýymdastyǵynyń sımvoldyq tulǵasy bolyp sanalady.

Mallallı 2018 jyly Londonnyń alǵashqy áıel epıskopy boldy. 2001 jyly dinı qyzmetke kiriskenge deıin ol densaýlyq saqtaý salasynda jumys istegen, onkologııaǵa mamandanǵan jáne 37 jasynda Anglııanyń bas meıirgerlik ınspektory atanyp, bul laýazymdy ıelengen eń jas adam bolǵan.

Malallıdiń qyzmetine kirisýiniń resmı rásimi 2026 jyldyń naýryz aıynda Kenterberı soborynda ótedi.

Eske sala ketsek, elordadaǵy Táýelsizdik saraıynda Prezıdent Qasym-Jomart Toqaevtyń qatysýymen Álemdik jáne dástúrli dinder kóshbasshylary VIII Seziniń deklaratsııasy qabyldandy.