Andreı Samarın Sýrdlımpııa oıyndarynda Qazaqstanǵa 7 altyn ákeldi
ASTANA. KAZINFORM — Japonııanyń astanasy Tokıoda ótip jatqan XXV jazǵy Sýrdlımpıada oıyndarynda grek-rım kúresinen qazaqstandyq balýan Andreı Samarın altyn medal jeńip aldy, dep habarlaıdy Týrızm jáne sport mınıstrligi.
67 keli salmaq dárejesinde fınaldyq beldesýde ol ırandyq palýan Mehdı Bakshyny 11:1 esebimen jeńip, Sýrdlımpıada chempıony atandy. Aqtyq synǵa deıin Andreı joǵary deńgeıdegi óner kórsetti.
Alǵashqy aınalymda qyrǵyzstandyq Dinmuhamed Bıgeldıevti 5:2 esebimen utsa, shırek fınalda bolgarııalyq Dılıan Dımıtrovty 8:0, al jartylaı fınalda armenııalyq Jora Gregorııandy da 8:0 esebimen aıqyn basymdyqpen jeńdi.
Andreı Samarın — Almaty oblysy, Jambyl aýdany, Qarǵaly aýylynyń týmasy. Jasy — 21-de. Ol 2023 jylǵy jastar arasyndaǵy álem chempıonatynyń jeńimpazy, sondaı-aq 2024 jyly Malaızııada ótken H Azııa–Tynyq muhıt oıyndarynyń chempıony atanǵan. Osy jeńistiń nátıjesinde Qazaqstan quramasynyń qorjynyndaǵy medal sany 14-ke jetti. Onyń ishinde 7 altyn, 2 kúmis jáne 5 qola júlde bar.
Aıta keteıik, bıylǵy Sýrdlımpıada oıyndary 15–26 qarasha aralyǵynda Tokıo qalasynda ótip jatyr. Bul — estý qabileti buzylǵan sportshylar arasynda tórt jylda bir ret uıymdastyrylatyn eń bedeldi halyqaralyq jarys. Baıraqty básekege 81 elden kelgen 3000-ǵa jýyq sportshy qatysyp, 21 sport túri boıynsha 209 dıstsıplınada júldelerdi sarapqa salyp jatyr. Qazaqstan quramasynyń namysyn 78 sportshy 8 sport túrinen qorǵaıdy.