Án-Ámire halqymen qaıta qaýyshty
ASTANA. QazAqparat - Astanada Qallekı teatrynyń sahnasynda alǵash ret aty ańyzǵa aınalǵan Ámire Qashaýbaev týraly spektakl kórermen nazaryna usynyldy. QR Táýelsizdiginiń 25 jyldyǵy aıasynda Q.Qýanyshbaev atyndaǵy memlekettik akademııalyq qazaq mýzykalyq drama teatrynyń ujymy tartý etken bul qoıylym Ámireniń (Qasymhan Buǵybaı) 1925 jyly Parıjde ótken dúnıe júzilik «EKSPO» kórmesinde áýelegen ánimen Eýropa jurtyn moıyndatýy, elge oralyp, solaqaı saıasattan túrli quqaıdy bastan keshken qıly taǵdyry jaıly syr shertedi.
Bul Rahymjan Otarbaev pen Nurlan Jumanııazovtyń birlesken ekinshi jumysy. Buǵan deıin «Nashaqorlar jaıly novella» pesasynyń jelisimen qoıylǵan «Kóleńkesiz jolaýshy» dramasy kórermenniń ystyq yqylasyna bólengen edi.
Pesada Mustafa Shoqaı, Isa Baızaqov, mýzyka zertteýshisi Romen Rollan sekildi tarıhı beıneler kórinis tapqan. Ásirese, jyraqta júrip, elin saǵynǵan Mustafanyń beınesin Janqaldybek Tólenbaev óte sátti somdap shyqty. Ámireniń Álıhan Bókeıhanovtyń hatyn Mustafaǵa jetkizýi de Mustafa Shoqaı men Alash qaıratkerleriniń rýhtas, úndes bolǵanyn kórsetedi.
Ámire týraly 800-den astam maqala jazǵan, Almatydan arnaıy kelgen jýrnalıst Jarqyn Shákárim qoıylymǵa joǵary baǵa berdi. Pesadaǵy oqıǵalardyń barlyǵy shyn tarıhı derekter ekenin, ony arhıvtegi qujattar dáleldeıtinin aıtty.
Qoıylymda ábden zábir kórip, qajyǵan Ámireniń «Serke eshkimge aıtpaıdy» deıtin tusy bar. Ámireniń zamandasy, tanymal akter Serke Qojamqulov ómiriniń sońǵy jyldary "sertin buzyp", sol kezdegi jas jýrnalıst Jarqyn Shákárimge Ámire taǵdyrynyń bar shyndyǵyn baıandap ketken eken. Sol áńgime búgingi pesaǵa arqaý bolǵan. Jarqyn Shákárim óziniń «Parıjdegi Ámire» kitabyn Qallekı teatrynyń kórkemdik jetekshisi Talǵat Temenovke tartý etti. Teatr ujymy da óz kezeginde jýrnalıstiń ıyǵyna shapan jaýyp, qurmet kórsetti.
Taǵy bir qyzyqty jaıt, ánshi jaıly búgingi premera Ámireniń ómirden ótken kúnimen tuspa-tus keldi. Qamshynyń sabyndaı qysqa ǵana ǵumyrynda ólmes mura qaldyryp, óshpes dańqqa bólengen Ámire qazaqtyń «Uly Tenory» bolyp jasaı bermek.
