«Altyn dán-2023»: Qyzylordada eńbek ozattary marapattaldy
Búgin «Altyn dán-2023» dástúrli is-sharasynda aımaqtaǵy egin jınaý naýqany qorytyndylandy. Oblys ákimi Nurlybek Nálibaev dala eńbekkerlerin quttyqtap, ala jazdaı eńbek etip, qambany kúrishke toltyrǵan sharýalardyń adal eńbegin joǵary baǵalady, dep habarlaıdy Kazinform Qyzylorda oblysy ákiminiń baspasóz qyzmetine silteme jasap.
«Alty alashqa ana bolǵan Syr óńiriniń oblys bolyp qurylǵanyna bıyl 85 jyl. Qyzylordalyqtar bul mereıtoıǵa úlken tabyspen jetti. Jaqynda oblysqa issaparmen kelgen Memleket basshysy aımaqtyń damýyna joǵary baǵa berdi. Qasym-Jomart Kemeluly Naǵı Іlııasov aýylynda ótken eńbek adamdarymen kezdesýde: «Shyn máninde, eńbek adamdary – halqymyz úshin eń qajet azamattar. Eń aldymen, biz eńbek adamdaryna qurmet kórsetýimiz kerek. Sizder aq kúrishtiń atasy – Ybyraı Jaqaevtyń jolyn jalǵap júrsizder. Sondyqtan men sizderdi qoldaımyn»,– dep qoshemet bildirdi. Prezıdent Syr óńiriniń brendi – kúrish óndirisin kórý úshin «Altyn orda» zaýytynda boldy. Aýyl sharýashylyǵy taýaróndirýshileriniń ónimderimen tanysyp, dıqandar men sharýalardyń eńbegine tabys tiledi. Bul – barsha eńbek adamdaryna berilgen oń baǵa, kórsetilgen qurmet», – dedi oblys ákimi.
Nurlybek Mashbekuly QR Premer-mınıstri Álıhan Smaıylovtyń Cyr dıqandaryna joldaǵan arnaıy quttyqtaý hatyn oqyp berdi.
Aıta keteıik, aımaqta 9 aıdyń qorytyndysymen aýyl sharýashylyǵy ónimderiniń óndirisi 157 mlrd.teńgege jetti. Jalpy ishki ónimdegi osy salanyń úlesi 6 paıyzdy qurady. Sońǵy 3 jyldyń ishinde aýyl sharýashylyǵynyń negizgi qoryna 32 mlrd 700 mln teńge ınvestıtsııa salyndy. Bıyl jalpy quny 7,9 mlrd.teńgeni quraıtyn 11 ınvestıtsııalyq jobany iske asyrý josparlanýda. Jyl ishinde salaǵa 14,0 mlrd teńge qarjylaı qoldaý jasaldy. Onyń 4 mlrd 700 mln teńgesi egin sharýashylyǵyn sýbsıdııalaýǵa baǵyttaldy.
Bıyl sý tapshylyǵy qatty sezilgen jyl boldy. Soǵan qaramastan Syr dıqandary eren eńbektiń úlgisin kórsetti. Egistik kólemi ótken jylmen salystyrǵanda 4 myń 800 gektarǵa ulǵaıtylyp, 193 myń 400 gektar jerge egin egildi. Onyń ishinde kúrishtik alqap 89 myń 100 gektar. Kúni keshe jıyn-terim naýqany aıaqtalyp, ár gektardan alǵashqy salmaqta 56,5 tsentnerden ónim alyndy. Qambaǵa 503 myń tonna astyq quıyldy.
Memleket basshysy "Ádiletti Qazaqstanda eńbek adamy eń birinshi orynda turady. Sebebi otanshyldyq - eń aldymen týǵan eliniń ıgiligine qyzmet etý" degen edi. Osy oraıda dástúrli merekeniń eń basty qurmeti eńbek adamdaryna kórsetildi. Kúrishshiler, sýshylar, kombaınshylar, mehanızatorlar, dıqandar, malshylar sahna tórine shyǵyp, marapatqa ıe boldy.
Іs-sharada sala qyzmetkerleri QR Premer-mınıstriniń alǵys hatymen, QR Aýyl sharýashylyǵy mınıstrliginiń «Eńbek ardageri» medalimen, «Aýyl sharýashylyǵy salasynyń úzdigi» tósbelgisimen, Qurmet gramotasymen marapattaldy.
Jyl qorytyndysymen top jarǵan ozattar túrli nomınatsııa ıelendi. Tórt túlik ósimin qamtamasyz etkeni jáne ónim óndirýde joǵary jetistikterge jetkeni úshin Aral aýdany marapattalsa, «Egin sharýashylyǵy» nomınatsııasynda Shıeli aýdany jeńimpaz atandy. Aýyl sharýashylyǵy ónimderin óńdeý salasy boıynsha joǵary kórsetkishterge Qazaly aýdany qol jetkizdi. «Agroónerkásip keshenin damytýda eń joǵarǵy kórsetkishterge qol jetkizgen úzdik aýdan» nomınatsııasy boıynsha Jańaqorǵan aýdany marapattalady.
Merekelik kesh kontserttik baǵdarlamaǵa ulasty. Sahna juldyzdary dala eńbekkerleriniń qurmetine ásem án shyrqap, merekeni dýmanǵa bóledi.
