Almatyǵa Jeńis Estafetasy jetkizildi
«Biz bul Estafetany qabyldaı otyryp, burynǵy KSRO halyqtarynyń Uly Otan soǵysynda kórsetken máńgi óshpes erlikterin qasterleıtinimzdi taǵy da dáleldeımiz. Áskerı boryshymyzǵa qashanda adal bolamyz. Eger otanǵa qaýipsizdik tónse, elimizdiń táýelsizdigi úshin bar kúshimiz ben ómirimizdi berýge daıynbyz» - dedi óz sózinde QR UQK Shekara qyzmeti akademııasy bastyǵynyń ǵylymı jumystar jónindegi orynbasary, polkovnık Alekseı Gorıachko.
Óz kezeginde QR UQK Shekara qyzmetiniń «Shyǵys» óńirlik basqarma bastyǵynyń tárbıe jónindegi orynbasary, polkovnık Muratbek Serikbaev aǵa urpaqtyń soǵys jyldarynda qalyptasqan jaýyngerlik dástúrleri búgingi zamanda da qasıetti bolyp esepteletindigin jetkizdi
«Shekara qyzmetiniń árbir ofıtseri, serjanty, sarbazy Uly Otan soǵysy sarbazdarynyń erlikterin qashanda qaster tutady jáne syılaıdy. Soǵys - adam balasy oılap tapqan eń úlken qasiretterdiń biri ekeni belgili. Soǵys - ol san myńdaǵan jetimder men jesirler, aǵaıyn, týǵan-týysty joǵaltý. Sondyqtan soǵys órti eshqashanda tutanbasyn. Bul ótkizilip otyrǵan shara shekarashylardyń patrıottyq sezimin, rýhyn oıatýǵa baǵyttalǵan», - dedi M. Serikbaev.
Sonymen qatar, ol budan keıin Jeńis estafetasynyń qazaq-qyrǵyz shekarasyna jetkiziletindigin aıtty.
«Jeńis Estafetasy 23 sáýir kúni Astanadan Almatyǵa Shekara qyzmetiniń avıatsııalyq bazasyna jetkizilgen bolatyn. Keıin ol Qazaqstannyń Qytaımen shektesetin shekara boıymen alyp ótildi. Budan keıin Shekara qyzmetiniń quramalary men bólimderinde tıisti is-sharalar ótkizildi. Al búgin mine Jeńis Estafetasy shekarashylardyń alma-materi - Shekara qyzmeti akademııasyna jetkizildi. Budan keıin ol Qazaqstan men Qyrǵyzstan shekarasynda ornalasqan «Qarasaı» shekara zastavasynda jáne Qytaı Halyq Respýblıkasymen shektesetin shekara aımaǵynda bolady. 28 sáýir kúni Almaty qalasyndaǵy 28-shi Panfılovshylar saıabaǵynda úlken is-shara ótedi. Sol jerde Jeńis Estafetasy qala jurtshylyǵyna kórsetiledi. Keıin ol qazaq-qyrǵyz shekarasy boıymen alyp ótilip, Taraz shekara jasaǵyna jetkiziledi. Ol jerde de tıisti is-sharalar ótkiziledi. Odan soń Jeńis Estafetasy 1-shi mamyr kúni «Qordaı» shekara beketinde qyrǵyz shekarashylaryna saltanatty túrde tabys etiledi», - dedi M. Serikbaev.
Aıta ketelik, TMD elderi basshylarynyń Uly Jeńistiń 70 jyldyǵyn toılaý týraly sheshimine sáıkes, bıyl TMD elderiniń shekarasy boıymen Jeńis estafetasy alyp ótiledi. Bul joly, ıaǵnı bıyl, Estafeta bir mezette ústimizdegi jyly 2 aqpanda Brest qalasy men Mýrmansk qalasynda bastaý alǵan bolatyn. Ol jerlerde UOS men Brest qamalyn qorǵaǵan batyrlarynyń rýhyna taǵzym etildi. Brest qalasynan bastaý alǵan Jeńis Estafetasynyń baǵyty: Belorýssııa - Reseı - Armenııa - Reseı bolyp belgilendi. Al Mýrmanskiden bastaý alǵan Jeńis Estafetasy Reseı shekarasy boıymen alyp ótilip, 21 sáýir kúni Óskemende qazaqstandyq shekarashylarǵa tabys etildi. Budan keıin Estafeta Astana, Almaty, Taraz, Qordaı qalalary arqyly ótedi. Birinshi nemese ekinshi mamyrda «Qordaı» shekara beketinde qyrǵyzstandyq shekarashylarǵa tabys etiledi. Budan ári Estafeta Qyrǵyzstan, Tájikstan, Ózbekstan, Túrkimenstan jáne Ázerbaıjan memleketteri arqyly ótedi. Jeńis Estafetasynyń baǵyty 28 mamyrda Máskeý qalasynda Taǵzym taýynda aıaqtalady. Sóıtip, Jeńis Estafetasy Máskeýdegi shekarashylar mýzeıine tabys etiledi.
Taǵy bir aıta ketetin jáıt, Jeńis Estafetasyn shekara boıymen alyp ótý dástúri 1985 jyly qolǵa alynǵan. Ondaǵy maqsat - UOS jyldarynda shekarada jaýǵa qarsy turǵan jaýyngerlerdiń erligin máńgilik este saqtaý, jastardy sol soǵysqa qatysqan ata-balalarymyzdyń erlik isterin úlgi ete otyryp, patrıottyq rýhta tárbıeleý, TMD elderi halqynyń dostyǵyn nyǵaıtý jáne shekara mańynda turatyn turǵyndardy memlekettik shekarany qorǵaýda shekarashylarǵa belsendi túrde kómektesýge shaqyrý.
