Almatyda stýdenttik bes saıt ashyldy
ALMATY. 15 naýryz. QazAqparat - Búgin Almatyda Ál-Farabı atyndaǵy Qazaq ulttyq ýnıversıteti jýrnalıstıka fakýltetinde zerger.ucoz.com, beles.ucoz.net, zamana.ucoz.com, bastau.ucoz.org, 103akparat.ucoz.com dep atalatyn stýdenttik bes saıttyń tusaýy
kesildi.
«Aqparat zamanynyń talaby men keńistiginiń keńeıýi kezeńinde, bolashaq jýrnalıst aqparattar tizginin ustaý úshin aqparattyq tehnologııa men mýltımedıalyq quraldarmen til tabysa bilýi tıis. Mýltımedıalyq materıaldardy jınaý, óńdeý, ıgerý, meńgerý jáne buqaraǵa jarııalaý stýdenttik aýdıtorııadan bastaý alady. Búgin ashylǵan saıttarda jastardyń tyrnaq aldy týyndylary ǵalamtorǵa jol tartady», - dedi saıttyń ashylýyna jetekshilik etken oqytýshy, saıası ǵylymdarynyń doktory Gúlmıra Sultanbaeva.
Shara barysynda saıttardyń maqsatymen tanystyrǵan stýdent Araılym Ákim: «Jalpy jańalyq ataýlynyń, eń aldymen, jastar arasynda keń taralytyny ras. Sol jańalyqtyń jarshysy retinde arman qýǵan bir top stýdent ǵalamtordan bul saıttardy ashyp otyr. Jańalyqtar, qyzyqty áńgimeler, oqyrmanmen oı bólisý - bizdiń mindetimiz», - deıdi. Stýdenttik saıttarda «Syrshyl suhbat», «Sońǵy jańalyqtar», «Qonaqjaı» jáne t.b. aıdarlar bar.
Atalmysh saıttardy ashqan oqý ornynyń bolashaq jýrnalısteri osylaısha aqparattar tizginin ustaýdy birinshi kýrstan qolǵa almaq.
