Almatyda ımamdar biliktiligi boıynsha baq synady
«Eltanym» jobasy Almaty qalasy Qoǵamdyq damý basqarmasynyń qoldaýymen, «Úsh baılyq» qoǵamdyq birlestiginiń uıymdastyrýymen ótkizilip keledi.
Joba aıasynda bıyl 20-29 tamyz aralyǵynda ımamdardyń biliktiligin joǵarylatýǵa baǵyttalǵan oqytý semınary ótken bolatyn.
Bul semınarlardyń qorytyndysy boıynsha 2019 jyldyń 9 qyrkúıeginde ımamdardyń alǵan bilimderin baǵalaýǵa baǵyttalǵan «Eltanym» baıqaýynyń qalalyq irikteý kezeńi ótti. Sol baıqaýdyń qorytyndysy boıynsha 24 qatysýshynyń ishinen 8 qatysýshy sheshýshi kezeńge joldama alǵan bolatyn.
Bıylǵy baıqaýda 8 ımam baq synady.
Birinshi kezeńde ár qatysýshynyń ulttyq salt-dástúr men ıslam dini qaǵıdattarynyń úndestigine qatysty bilimi baǵalandy.
Ekinshi kezeńde ımamdardyń qazaq dalasyna ıslam dinin taratýshy uly tulǵalardyń eńbekteri týraly bilimderi tarazyǵa tústi.
Úshinshi kezeń boıynsha belgili bir jaǵdaıatqa baılanysty ımamdar ýaǵyz aıtty. Qazylar til tazalyǵyna, oı júıeliligine, sóz qysqalyǵy men mazmunyna basa mán berdi.
Mazmun tereńdigi men ádebı tildik norma da nazardan tys qalǵan joq.
Baıqaý qorytyndysy boıynsha bas júlde Naýryzbaı aýdany Qaraǵaıly meshitiniń Naıb ımamy Temirbek Pernebekke buıyrdy. Oǵan bas júlde dıplomy jáne 300 000 teńgeniń sertıfıkaty tabystaldy.
1-oryndy Túrksib aýdany Túrksib meshitiniń Naıb ımamy Mıras Qasymov aldy. Ol I dárejeli dıplom jáne 200 000 teńgeniń sertıfıkatyna ıe boldy.
2-orynǵa laıyq dep tabylǵan Alataý aýdany, «Ál-Azım» meshitiniń naıb ımamy Jomart Kersheevke II dárejeli dıplom jáne 150 000 (júz elý myń) teńgeniń sertıfıkaty berildi.
3-orynǵa qazylar Áýezov aýdany Aqshaı meshitiniń Naıb ımamy Qýanysh Ábishevti laıyq dep taýyp, III dárejeli dıplom men 100 000 teńgeniń sertıfıkatyn berdi.
Sonymen qatar, 2 qatysýshyǵa dıplom jáne 75 000 teńgeniń 2 sertıfıkaty tabystaldy.
Taǵy eki qatysýshyǵa arnaıy 2 dıplom jáne 50 000 teńgeniń 2 sertıfıkaty tabys etildi.
«Basty maqsat qazaqtyń salt-dástúrin bilýi boıynsha ımamdar men din qyzmetkerleriniń bilimin jetildirý, ulttyq salt-dástúrdi jáne uly tulǵalardyń din jaıyndaǵy eńbekterin halyq arasynda nasıhattaý arqyly ulttyq qundylyqtardy dáripteý bolyp otyr. Sonymen qatar, qazaqtyń salt-dástúrlerin, yrym-tıymdaryn biletin din qyzmetkerlerin qoldaý, qazaq dalasyna ıslam dinin taratýshy uly tulǵalardyń eńbekterin kópshilikke nasıhattaý, jas urpaqtyń sanasyna ulttyq qundylyqtardy sińirýge ıslam qaǵıdattary arqyly úles qosý kózdelgen», - dedi uıymdastyrýshylar.
Baıqaý merekelik kontsertke ulasty. Kórermenderge Jantý Dadabaev, Aıdana Qabdylova, Raýan Eksilov án men kúıden shashý shashty.
