Almatyda eń úzdik eriktiler marapattaldy
Forýmdy «Qazaqstan eriktileri lıgasy» qoǵamdyq qory uıymdastyrdy. «Eriktiler jyly» qarsańynda respýblıkalyq jastar qozǵalysynyń saıty ashyldy.
«Búgingi tańda eriktiler qozǵalysy eń ózekti jáne qarqyndy damyp kele jatqan ınstıtýttardyń birine aınalýda. Bizdiń uıymnyń qurylǵanyna 5 jyl boldy. Eriktilikpen aınalysyp júrgen nemese eriktiler qataryna qosylýdy josparlaǵandar úshin 2020 jyl keń múmkindikter ashady. Bul qoǵamdaǵy eriktilikke degen kózqarasty ózgertedi. Memlekettik saıasat volonterlikti tolyǵymen qoldaıtyndyǵy jáne keńinen taraǵany bizdi qýantady», - dedi uıymnyń tóraıymy Aısulý Ernııazova.
Sonymen qatar, ol kelesi jylǵa - «Eriktiler jylyna» daıyn ekendigin bildirdi jáne alda kóp jumys kútip turǵanyn aıtty.
Forýmǵa qatysyp jatqan 1000 erikti jáne olardyń ata-analary, jumys berýshiler, seriktester arnaıy kontserttik baǵdarlamany tamashalady. Sahnada qazaqstandyq estrada juldyzdary óner kórsetti. Jastardyń súıiktisi ánshisi Alı Oqapov sharanyń qurmetti qonaǵy boldy.
Eske salaıyq, ústimizdegi jyldyń 27 tamyzynda Qazaqstan Prezıdenti Qasym-Jomart Toqaev 2020 jyldy «Eriktiler jyly» dep jarııalady. Sondaı-aq, Memleket basshysy onyń basty maqsattaryn belgiledi: azamattardyń, ásirese jastardyń, stýdentterdiń volonterlyq is-sharalarǵa qatysýyn keńeıtip, belsendi ómirlik ustanym daǵdylaryn qalyptastyrý kerektigin aıtty.