Almatyda Batyrlarǵa taǵzym aktsııasy ótedi

ALMATY. QazAqparat- Ekinshi dúnıejúzi soǵysyna qatysqan qazaqstandyq ardagerlerdi eske alý maqsatynda «Batyrlarǵa taǵzym» aktsııasy 9 mamyr saǵat 9:30-da bastalady, dep habarlaıdy QazAqparat tilshisi.

Osy ýaqytta Máńgilik alaýǵa gúl shoǵyn qoıý úshin ortalyq mádenıet jáne demalys saıabaǵynan 28 gvardııashyl-panfılovshy saıabaǵyna deıin qala turǵyndary júrip ótedi.

Bul týraly Almaty óńirlik kommýnıkatsııalar qyzmetiniń brıfınginde Almaty qalalyq ardagerler keńesiniń tóraǵasy Ahan Bıjanov aıtty.

«Almatyda gúl shoǵyn qoıý rásimi, estelik is-sharalar, ardagerlerge arnalǵan merekelik kontsertter ótkiziledi. «Jaýjúrek polk» týraly aıtatyn bolsaq, soǵan uqsas Belarýste «Belarýstyń esinde», al Ýkraınada «Eshkim de, eshteńe de umytylmaıdy» dep atalatyn aktsııalar ótedi. Bizde ony «Batyrlarǵa taǵzym» nemese «Jaýjúrek polk» dep ataıdy. Bul kúni soǵys ardagerleriniń urpaqtary atalarynyń sýretin Ortalyq mádenıet jáne demalys saıabaǵynan 28 gvardııashyl-panfılovshylar atyndaǵy saıabaqqa deıin alyp júre alady», - dedi spıker.

Sonymen qatar, ol el boıynsha bul aktsııanyń Almatyda ǵana oflaın formatta ótetinin tilge tıek etti.