Almatyda 10 myń turǵyn emhana aýystyrdy

ALMATY. QazAqparat – Elimizde azamattardy emhanaǵa tirkeý naýqany aıaqtaldy. Jyl saıyn 15 qyrkúıek pen 15 qarasha aralyǵynda ótetin dástúrli naýqan barysynda 10 myńǵa jýyq almatylyq emhana aýystyrdy. Bul týraly búgingi brıfıngte «Áleýmettik medıtsınalyq saqtandyrý qory» KEAQ Almaty qalalyq fılıalynyń dırektory Tileýhan Ábildaev málim etti, dep habarlaıdy QazAqparat tilishisi.

Onyń aıtýynsha, bıylǵy tirkeý naýqanyna 77 emhana qatysty, onyń 4-eýi - jańa. Atalǵan klınıkalar 2021 jyldan bastap halyqqa qyzmet kórsete bastaıdy.

«Emhana aýystyrǵan azamattardyń 92% jeke menshik klınıkalardy tańdaǵan. Biraq kompanııa nátıjesi boıynsha memlekettik emhanalarǵa basymdyq bergen turǵyndar sany edáýir kóp. Almatylyqtardyń kópshiligi «LS clinic» JShS, «Makıza» JShS, «Asmed» JShS, «A CLINIC» jáne «Almaty qalasynyń Ortalyq otbasylyq emhanasy» JShS tirkelgen»,– deıdi fılıal basshysy.

Sonymen qatar, ol azamattardyń emhana aýystyrý quqyǵy dástúrli kompanııamen shektelmeıtinin atap ótti.

Zań boıynsha emhanany turǵylyqty mekenjaıyn, jumysyn nemese oqý ornyn aýystyrǵanda, basqa jaqqa qonys aýdarǵanda, burynǵy emhana jabylǵan nemese qyzmet kórsetýdi toqtatqan jaǵdaıda da aýystyrýǵa bolady.

Odan bólek, ár turǵyn jylyna bir ret erkin tańdaý quqyǵyn paıdalana alady.

Esterińizge sala ketsek, bıylǵy tirkeý naýqany barysynda emhana aýystyrǵan azamattar jańa emdeý mekemesiniń qyzmetin 2021 jyldyń 1 qańtarynan bastap paıdalana alady.