Almaty teatrynda «Abaıdyń jumbaǵy» sahnalandy
M.Áýezov atyndaǵy Qazaq Ulttyq akademııalyq teatrynda «Abaıdyń jumbaǵy» spektakli kezekti ret sahnalandy. Qazaq rýhanııatynyń pasporty atanǵan Abaı tulǵasyn zertteý sirá eshqashan aıaqtalmas.
Bul qoıylymda da uly aqyn qoǵam dertiniń daýasyn izdep sharq urady. Sansyz saýaldarǵa jaýap izdep, shyndyq pen aqıqatqa jetýdiń sherli jolynda júredi.
Myńmen jalǵyz alysqan Abaı beınesin Qazaqstannyń eńbek sińirgen qaıratkeri, «Qurmet» ordeniniń, «Qulager» syılyǵynyń ıegeri, akter Bolat Ábdilmanov osy joly sol bıiginen tómendetken joq. Abaıdyń óz qarasózderi men óleńderi boıynsha jazylǵan kompozıtsııalyq qoıylymnyń sahnalyq nusqasyn belgili jazýshy-dramatýrg Madına Omarova jasady. Qoıýshy rejısseri – Arıdash Ospanbaeva. Qoıýshy sýretshi – Murat Saparov.
Utymdy rejıssýralyq sheshim, sheber akterlik quram Abaıdyń onsyz da bıik tulǵasyn asqaqtata tústi.
Birneshe saǵatqa sozylǵan spektaklde uly hakimniń ǵumyry, tulǵalyq qalyptasýy tizbektelip kórsetildi.
Bala Abaıdyń kóńilinde erte bastan týyndaǵan rıtorıkalyq saýaldar kórermenniń kóńilin tolqytady. Jas Abaıdyń kókiregindegi ý men dert, zapyran, tuńǵıyq oı tragedııalyq monologpen beriledi.
Spektakldiń dekoratsııasynda mınımaldy stıl aıqyn. Biraq, bul qoıylymnyń mazmunyn kerisinshe asha túsken. Ásirese dóńgelek úlken aına «qoǵamnyń aınasy» tárizdes onyń kemshiligi men olqylyǵyn kórsetip tur.
Aınanyń shyndyǵynan, aqıqatynan qashý múmkin emes.
Sahnadaǵy ár qımyl qozǵalys, ár monolog pen dıalog adamdarǵa «endi óz kókeıińdegi aınańa úńil, soǵan qarap túzel» degen oı tastap turǵan sııaqty bolady.
Jas Abaıdyń rólinde N.Qýanyshbaıuly kórinse, Qunanbaıdyń obrazynda belgili akter S.Merekeuly, Zere men Uljan beınesinde G.Tutova men Sh.Asqarova, Toǵjan rólinde D.Úsenova oınaıdy, jas akter J.Qonysbaı Ábdirahmannyń, al Ospannyń kelbetin E.Turysov keıipteıdi.
Aıta ketý kerek, teatrǵa kelýshilerdiń sany 100 adamnan asqan joq. Epıdemıologııalyq qaýipsizdik maqsatynda barlyq sanıtarlyq talap, 1,5 metrlik qashyqtyq qatań saqtaldy.
Esterińizge salaıyq, M.Áýezov atyndaǵy Qazaq memlekettik akademııalyq drama teatrynyń ashylǵanyna 95 jyl tolýyna oraı mádenıet ordasyna «ulttyq teatr» dárejesi berildi.
Saltanatty sharaǵa QR Mádenıet jáne sport mınıstri Aqtoty Raıymqulova qatysty.
