Almaty oblysynda balaǵa jaı tústi

QONAEV. QazAqparat – Almaty oblystyq balalar klınıkalyq aýrýhanasyna 11 jastaǵy naızaǵaıdan jaraqat alǵan bala tústi. Naızaǵaı soqqysynan balanyń arqasy, beli jáne sol aıaǵynyń tómengi jaǵy kúıip qalǵan, - dep habarlaıdy QazAqparat tilshisi.

«31 shilde kúni jedel járdem kóligimen 11 jastaǵy naızaǵaı soqqysynan jaraqat alǵan bala tústi. Aýrýhanaǵa túsken kezde patsıenttiń jaǵdaıy ortasha aýyr boldy. Onyń arqasyn, belin jáne sol jaq aıaǵynyń tómengi jaǵyn termııalyq kúıik shalǵan. Balaǵa shuǵyl kómek kórsetildi. Qazir bala travmatologııa bóliminde hattama boıynsha em qabyldap jatyr», - dedi aýrýhana dırektorynyń orynbasary Qalıev Asqar Sáýlebekuly.

Dárigerler shilde-tamyz aılarynda naızaǵaı jerge jıi soǵatynyn eskertip, ata-analardy balalaryna saq bolýǵa shaqyrady. Atalǵan aýrýhana dárigerleri qaıǵyly jaǵdaıdyń aldyn alý maqsatynda ata-analarǵa arnap arnaıy jadynama usynady.

• Jalǵyz ósken aǵashtyń astyna tyǵylmańyz. Ondaı aǵashtar naızaǵaı tartýy múmkin. Ásirese, terekter, shyrshalar men qaraǵaılar qaýipti. Oıpatty jerlerde (shuńqyrlar, aryqtar, saılar) nemese avtomobıl joldarynyń astyndaǵy sý ótkizgishterde jasyrynǵan durys.

• Qaltańyzdan metall zattardy (kiltter, shynjyr, oıynshyqtar) alyńyz.

• Eger siz velosıpedpen júrseńiz, odan kem degende 30 metr alystap, jańbyr aıaqtalǵanǵa deıin janyna jaqyndamańyz. • Uıaly telefondy biraz ýaqytqa óshirińiz.

• Eger sýǵa túsý kezinde naızaǵaı soǵa bastasa, shuǵyl túrde sýdan shyǵyp, jaǵadan 100 metr qashyqtyqta júrińiz. Sý elektr togyn jaqsy ótkizedi jáne naızaǵaı tartady.

• Múmkindiginshe kólikte nemese ǵımaratta jasyrynyńyz. Eger bul múmkin bolmasa, joǵarydaǵy usynystardy oryndańyz

• Jaıaý júrýdi toqtatyp, jaqyn mańdaǵy ǵımaratta kútken durys. Aıaldamada kútý qaýipti. Óıtkeni jel aıaldama shatyryn ushyryp áketýi múmkin.

• Úıde bolsańyz, barlyq elektr qurylǵysyn óshirip, terezelerdi jabyńyz.

• Balkonǵa nemese aýlaǵa shyqpańyz. Burshaq jaýa bastasa, terezeden alys jerde bolǵan durys. Óıtkeni burshaq terezeni syndyrýy múmkin.