Almaty áýejaıyn áýrege salǵan mysyq tabyldy
ALMATY. QazAqparat - Almatydan Jezqazǵanǵa ushý barysynda zardap shekken mysyqqa baılanysty Almaty halyqaralyq áýejaıynda qyzmettik tekserý júrgizildi, dep habarlaıdy QazAqparat tilshisi.
Janýardyń ıesi Katıra Kabdývahıt óziniń Instagram paraqshasynda 3 qyrkúıekte barlyq qajetti anyqtamalardy jınap, mysyqty kólik kompanııasy arqyly Almatydan alyp ketkenin aıtqan edi.
Biraq, Jezqazǵanǵa jetken soń mysyqtyń joq ekeni, keıinirek ony bortqa qabyldamaǵany jáne onyń qoımada qalǵany belgili boldy.
Mysyq tek 3 qyrkúıektiń túninde ıesine jaraqatpen jetkizildi.
Osyǵan baılanysty Almaty áýejaıynyń baspasóz qyzmeti 4 qyrkúıek kúni Almaty halyqaralyq áýejaıynda mysyq ıesiniń ótinishi boıynsha jedel qyzmettik tekserý júrgizilgenin, janýardy alyp júrýge, tıeýge jáne jóneltýge qatysty qyzmetkerlerdiń suralǵanyn, júk qoımasy men ushaq turaǵyndaǵy beınebaqylaý kameralary zerttelgenin málimdedi.
«Nátıjesinde, júk tıelgenge deıin tasymal zatynyń zaqymdalmaǵany, janýardyń jaraqat almaǵany anyqtaldy, qyzmetkerler tordyń soǵylýyna jáne qulaýyna jol bermegen.
Júk bólimine júktep jatqan kezde, mysyq alańdaı bastap, tordyń esigin buzyp, perronǵa sekirip shyǵyp ketken.
Biraz ýaqytqa deıin ol ushqaly jatqan laınerlerdiń, olarǵa qyzmet kórsetetin arnaıy mashınalarǵa jaqyn jerde, perronda júgirip júrgen.
Osydan keıin ol metall qorshaý-toryna órmelep, tehnıka jumys istep jatqan qurylys alańyna ótip ketken.
Dál osy sátte onyń jaraqat alýy ábden múmkin.
Jarty saǵat boıy ol qurylys alańynda tyǵylyp júrdi, janýardy odan saıyn shoshytpaý úshin shý men jumys toqtatyldy.
Al áýejaı qyzmetkerleri bolsa, mysyqtyń arnaıy tehnıka dońǵalaqtarynyń astynda qalyp qoımaýy úshin ony tez aýlaýǵa kúsh salǵan.
Mysyqty izdep jatqanda ushaq óz kestesi boıynsha ushyp ketken.
Tabylǵan mysyq júk termınalyna qaıtarylady, oryn alǵan jaǵdaı bir saǵat ishinde Asia Freight kompanııasyna habarlandy.
Kompanııa qyzmetkerleri mysyqtyń ıesine tez arada habarlasyp, olarǵa bolǵan jaǵdaı týraly habarlaýy kerek edi», - dep naqtylady vedomstvodan.
