Almatynyń qandaı nysany UFC týrnırin qabyldaı alady
ALMATY. KAZINFORM – Almatyda bıyl aralas jekpe-jekten álemdik promoýshen UFC-diń týrnıri ótýi múmkin.
Bul aqparatty birneshe aı buryn qalalyq Sport basqarmasy rastady. Eske salaıyq, 2025 jyly 21 maýsymda Ázerbaıjan astanasynda ótken UFC týrnırinen keıin uıymdy Qazaqstanǵa shaqyrý týraly áńgimeler jańa serpin aldy.
Elimizde mıllıondaǵan jankúıeri bar promoýshenniń týrnırin ótkizý múmkindigi burynnan aıtylyp keledi. 2020 jyly Astana UFC Fight Night 176 týrnıri qabyldaýy tıis bolǵan. Alaıda pandemııaǵa baılanysty ol ótpeı qaldy. Qazirgi ýaqytta UFC týrnırleri álemniń 30 elinde uıymdastyrylǵan. TMD elderiniń arasynda ázirge álemdik uıym tek Reseı men Ázerbaıjanǵa keldi.
Kazinform agenttiginiń saýalyna jaýap bergen Almaty qalasynyń sport basqarmasy týrnırdi uıymdastyrý jumysy áli de kelissóz satysynda ekenin naqtylady. Qazirgi ýaqytta is-sharany ótkizý merzimi jáne qarjylandyrý kózderi boıynsha máseleler talqylanyp jatqandyqtan, naqty sheshim qabyldanbaǵan.
- Almatyda UFC týrnırin ótkizý múmkindigin qarastyrý aıasynda UFC uıymymen kelissózder júrgizilip jatyr. Qazirgi tańda bul baǵyttaǵy jumystar bastapqy kezeńde, naqty sheshimder qabyldanǵan joq, - dep málimdedi basqarmadan.
Vedomstvo jaýabyna sáıkes, qalada týrnır ótkizý týraly sheshim qabyldansa, ony «Almaty arena» kesheninde uıymdastyrý josparlanyp otyr.
Buǵan deıin «Astana kontsert» kompanııasynyń prodıýseri Málik Hasenov UFC týrnırin elordadaǵy «Barys Arena» esh qıyndyqsyz ótkizýge bolatynyn aıtqan edi.
— Keshen UFC-diń barlyq raıderine sáıkes keledi. Onyń ústine elimizde óte tanymal jekpe-jek sportshylary bar, mysaly Shavkat Rahmonov. Týrnır ótkizýge tehnıkalyq jaǵynan da, ınfraqurylym boıynsha da daıynbyz. Tek jumys isteýdi qajet etetin baǵyt - halyqaralyq seriktester men demeýshilerdi tartý, — deıdi ol.
UFC-degi qazaqstandyq sportshylar
UFC alańynda jekpe-jekke shyǵyp, elimizdi tanytyp júrgen sportshylardyń qatary jyl saıyn artyp keledi. Eger Almatyda týrnır uıymdastyrylatyn bolsa, olardyń biri keshtiń basty oqıǵasynda óner kórsetýi de yqtımal. Bul tusta ásirese, eń jeńil salmaqtyń reıtınginde 7-shi turǵan Asý Almabaev pen jartylaı orta salmaqtyń reıtınginde 2-shi orynǵa jaıǵasqan Shavkat Rahmonovty atap ótýge bolady.
Ázirge UFC-degi otandyq sportshylardyń arasynda bıyl ótetin eki jekpe-jek resmı rastalǵan. Asý Almabaev 28 aqpanda Meksıkada ótetin UFC Fight Night týrnıriniń basty kezdesýinde Brendon Morenomen kúsh synasady. Al Álibı Ydyrys 22 aqpanda AQSh-tyń Hıýston qalasynda ótetin keshte Odı Osbornmen jolyǵady.
Sondaı-aq Dııar Nurǵojaıdyń áleýmettik jelidegi málimetinshe, ol 8 naýryz kúni UFC 326 týrnırinde Rafael Tobıaspen kezdesedi. Biraq bul jekpe-jek uıym tarapynan ázirge resmı rastalǵan joq.
Eske salaıyq, Shavkat Rahmonov pen Islam Mahachev UFC jekpe-jegine shyǵýy múmkin ekenin jazǵanbyz.