Almatynyń kadr rezervine 30 jas maman endi

ALMATY. KAZINFORM – Almatyda óńirlik kadrlyq rezervin qalyptastyrý qorytyndysy jarııalandy. Rezervke megapolıstiń damýyna óz úlesin qosýǵa daıyn, bolashaǵynan úmit kúttiretin jas mamandar iriktelip alyndy.

Baıqaýǵa 261 adam qatysty, onyń 30-y óńirlik kadr rezervine alyndy. Іrikteý birneshe kezeńnen turdy.

«Memleket basshysy bilimdi jastar, synı oılaı alatyn el patrıottary memleketti basqarý isine belsendi qatysýy tıis ekenin birneshe ret atap ótti. Bul turǵyda kadr rezervi dál osyndaı maqsatty jastarǵa ózderin tanytýǵa biregeı múmkindik beredi», - dedi QR Memlekettik qyzmet isteri agenttiginiń Almaty qalasy boıynsha departamentiniń basshysy Shynaraı Álimhan brıfıngte.

Rezervke alynǵandardyń arasynda ártúrli qyzmet salalarynyń ókilderibar. Atap aıtar bolsaq, memlekettik qyzmetshiler, oqytýshylar, medıtsına qyzmetkerleri, jeke sektor men bank salasynyń mamandary.

Іrikteý mynandaı baǵyttar boıynsha júzege asyryldy: «Indýstrııa jáne ónerkásip», «Ekonomıka jáne qarjy», «Áleýmettik sala», «Turǵyn úı-kommýnaldyq sharýashylyǵy jáne ınfraqurylym», «Tsıfrlandyrý».

Almaty qalasy ákimi apparaty basshysynyń orynbasary Baýyrjan Qabdol kandıdattar sý resýrstarynyń tapshylyǵy, shaǵyn jáne orta bıznesti damytý jáne qalalyq ınfraqurylymdy jańǵyrtý sııaqty qalanyń ózekti máselelerine qatysty ınnovatsııalyq jobalar usynǵanyn aıtty.

«Problemany tereń zerdeleý bóliginde joǵary ball jınaǵan, sondaı-aq olardy sheshýdiń naqty joldaryn usynǵan kandıdattar jobalaryn jaqyn arada júzege asyrady dep úmittemiz», — dedi ol.

Eki jyl ishinde rezervshiler konkýrstan tys negizde jergilikti memlekettik organdarda túrli laýazymdarǵa úmitker bola alady.

Úmitkerler tizimimen Óńirlik kadr rezerviniń saıtynda tanysýǵa bolady: onir.pkrezerv.gov.kz.

Osyǵan deıin, Memleket basshysynyń Jarlyǵyna sáıkes, 1 naýryz kúni óńirlik kadrlyq rezervke irikteý bastalǵany týraly jazǵan edik.