Almatylyq dárigerler 18 jastaǵy qyzdyń ómirin saqtap qaldy

ASTANA. KAZINFORM — Almaty Qalalyq kardıologııalyq ortalyǵynda alǵash ret júrektiń mıtral jáne trıkýspıdaldy qaqpaqshalaryna plastıka jasaý arqyly sátti ota júrgizildi. Bul týraly DSM baspasóz qyzmeti habarlady. 

Patsıentke sırek tyǵyzdalmaǵan mıokard jáne mıtral men trıkýspıdaldy qaqpaqshalardyń aıqyn jetkiliksizdigi dıagnozy qoıylǵan.

Ota júrek soǵyp turǵan kúıinde (Beating heart) jasaldy. Bul qazaqstandyq kardıohırýrgııa tájirıbesinde óte sırek kezdesetin jaǵdaı.

Otany Qalalyq kardıologııalyq ortalyqtyń dırektory, kardıohırýrg Ermagambet Kýatbaev basqarǵan hırýrgııalyq komanda júrgizdi.

18 jastaǵy qyz júrek jetkiliksizdiginiń dekompensatsııalanǵan klınıkalyq belgileri jáne sol qarynshanyń tómen shyǵarym fraktsııasymen shuǵyl túrde Kardıologııalyq ortalyqqa jatqyzyldy.

Patsıent jaǵdaıynyń aýyrlyǵyn jáne júrek transplantatsııasyna kórsetkishterin eskere otyryp, rekonstrýktıvtik ota jasaý týraly sheshim qabyldandy, óıtkeni jaqyn ýaqytta donor tabý jáne transplantatsııa júrgizý múmkin bolmady.

Gemodınamıkalyq turaqsyzdyqqa baılanysty qyz reanımatsııalyq bólimshege jatqyzylyp, arterıalyq qysymdy qoldaýǵa arnalǵan preparattardy qabyldady.

Keshendi tekserý nátıjeleri (EHO, MRT) tyǵyzdalmaǵan mıokard jáne júrek qaqpaqshalarynyń aıqyn jetkiliksizdigi dıagnozyn rastady.

Bul jaǵdaı ıÝrıı Pıa basshylyǵymen Heart Team UMC Júrek ortalyǵy mamandarymen telemedıtsına arqyly talqylandy.

Asqynýdyń joǵary qaýpine baılanysty júrekke soǵyp turǵan kúıinde ota jasaý sheshimi qabyldandy. Klassıkalyq nusqa, ıaǵnı jasandy qan aınalymyn paıdalanyp júrekti ýaqytsha toqtatý, mıokardta qaıtymsyz ózgeriske jáne aýyr júrek jetkiliksizdiginiń damýyna ákelýi múmkin edi.

Tyǵyzdalmaǵan mıokard — júrek qarynshalarynyń mıokard qurylymynyń buzylýymen sıpattalatyn genetıkalyq aýrý.

Bul patologııa óte sırek, halyqtyń shamamen 0,015%-da ǵana, kezdesedi jáne kóbine júrek jetkiliksizdiginiń tez damýyna jáne kenet ólim qaýpine ákeledi.

— Bul jaǵdaı tek aýrýdyń sırek kezdesýimen ǵana emes, sonymen qatar hırýrgııalyq tásildiń aıryqsha bolýymen erekshe. Mıtral jáne trıkýspıdaldy qaqpaqshalarǵa plastıka jasaý — olardyń ózin saqtaý jáne fýnktsııasyn qalpyna keltirýge múmkindik berdi, bul patsıenttiń ári qaraıǵy ómir sapasy úshin óte mańyzdy. Eń bastysy, bul ota júrek transplantatsııasyn kúte turýdy múmkin etedi, — dep atap ótti Ermagambet Kýatbaev.

Qazir patsıent reabılıtatsııadan ótip, úıge shyǵýǵa daıyndalyp jatyr. Qalalyq kardıologııalyq ortalyqtyń dárigerleri onyń densaýlyǵyn baqylaýdy jalǵastyrady.