Almatydy eki jylda 65 nysan súrilgen
ALMATY. KAZINFORM – Almatyda sońǵy eki jylda 65 zańsyz nysan, onyń ishinde turǵyn úı keshenderi tolyǵymen nemese ishinara buzyldy.
Qala qurylysyn baqylaý basqarmasy jyljymaıtyn múlik satyp almas buryn qurylys kompanııasynyń qujattaryn muqııat tekserýdi usynady. Budan bólek, basqarma ruqsat qujaty tolyq emes nemese jobadan aýytqyǵan jáne basqa da buzýshylyqtarmen salynǵan turǵyn úı keshenderin anyqtap, satyp alýǵa usynylmaıtyn úılerdiń tizimin jarııalap otyrady. Máselen, byltyr qarasha aıynda bul tizimde 36 turǵyn úı boldy.
– Jyljymaıtyn múlik naryǵyndaǵy mámilelerdegi shyǵyndardy boldyrmaý úshin qurylys salýshydan ruqsat qujattarynyń tolyq paketin talap etý kerek nemese qala qurylysyn baqylaý basqarmasynyń WhatsApp anyqtamalyq arnasy arqyly ruqsat qujattarynyń tolyq paketiniń bolýy týraly senimdi aqparat alý qajet +7 705 89 66 000. Sondaı-aq Almaty qalasy qalalyq josparlaý jáne ýrbanıstıka basqarmasynan qurylys salýshydan úleskerlerdiń qarajatyn tartýǵa ruqsattyń bolýy týraly aqparat alýǵa bolady,– dep jaýap berdi basqarmadan Kazinform agenttiginiń saýalyna.
2023 jyldyń basynan beri megapolıste 65 zańsyz nysan tolyǵymen nemese ishinara buzyldy.
– Byltyr tıisti ruqsat qujatsyz salynǵan tórt turǵyn úı kesheni sot sheshimimen buzyldy. Onyń ishinde «Frantsýz úıi» men «Graff» turǵyn úı kesheni bar, – dep atap ótti vedomstvodan.
Qazir qala aýmaǵynda 171 turǵyn úı kesheni qurylysy júrip jatyr.
Eske salaıyq, byltyr jyl soǵynda Almaty máslıhaty qurylys-montaj jumystarynyń kótergish jáne (nemese) qorshaý qurylymdaryn salý men qaıta qurýǵa qoıylatyn talaptarǵa sáıkestigin tekserý maqsatynda qurylys nysandaryna kirý tártibi bekitti. Atalǵan quqyqtyq akt jobasyn Almaty qalasynyń Qalalyq qurylys baqylaý basqarmasy Almaty ákimi Erbolat Dosaevtyń tapsyrmasymen ázirledi.
Qazir sáýlet-qurylys baqylaý organdarynyń qurylys nysandaryna kedergisiz kirý múmkindigi joq ekeni belgili. QR Kásipkerlik kodeksine sáıkes resmı ótinishterdiń negizinde ǵana tekserýge bolady.
Qurylys nysandaryna kirýdiń bekitilgen tártibi boıynsha ınspektsııa júrgizýge negiz retinde ruqsat qujattary joq qurylys-montaj jumystarynyń júrgizilýi, bekitilgen jobalyq-smetalyq qujattamadan aýytqý jáne qurylys-montaj jumystarynyń bastalǵany týraly habarlamanyń bolmaýy sekildi faktiler qyzmet ete alady. Osylaısha, bul tártip bastapqy kezeńinde zańsyz qurylystyń jolyn kesýge múmkindik beredi.
Bul rette, tekserý júrgizý úshin nysanda tıisti túrde habarlanǵan múddeli tulǵanyń bolmaýy ınspektsııa júrgizýge kedergi jasaı almaıdy. Bul jospardan tys tekserý júrgizý talaptarynan erekshelenedi.
Sondaı-aq Almatyda 12 qabattan joǵary qurylysqa tyıym salynýy múmkin.