Almatydaǵy velojarysqa 200-den astam velosıpedshi qatysty
ALMATY. KAZINFORM — Velosport áýesqoılary men ardagerleri dástúrli Giro d’Almaty-2025 shosselik jarysyna jınaldy. Bul týraly Almaty qalasy ákimdiginiń resmı saıty jarııalady.
Іs-sharany Almaty qalasy jattyqtyrýshylar qaýymdastyǵy uıymdastyrdy.
— Almatylyqtardan bólek, jarysqa Astana, Kókshetaý jáne elimizdiń basqa da qalalarynan kelgen sportshylar qatysty. Jarys marshrýty sport álemi men tabıǵat aıasyndaǵy umytylmas saıahatqa aınaldy. Árbir qatysýshy adrenalın men shabyt sezindi, — dedi Almaty qalalyq sport federatsııasynyń prezıdenti Bahtııar Mamyrov.
Jarys eki kezeńnen turdy. Birinshi kúni, senbide qatysýshylar Medeý aýdanyndaǵy ıAdrolyq fızıka ınstıtýtynan bastap bıik taýdaǵy «Medeý» muz aıdynynda márege jetti. Erler 63 shaqyrym, áıelder 35 shaqyrym qashyqtyqty eńserdi.
Jarystyń ekinshi kúninde sportshylar 9 shaqyrymdy baǵyndardy. Jeńimpazdar eki kúndik nátıje boıynsha anyqtaldy. Jarysqa 18 jastan asqan sportshylar qatysty.
Jas ereksheligi boıynsha jeńimpazdar:
- 18-29 jas: Islam Osmanov.
- 30-39 jas: Arsenıı Nıkıtın jáne Anastasııa Evtýshenko.
- 40-49 jas: Vadım Ejakov jáne Ekaterına Shatnaıa.
- 50-59 jas: Talǵat Ámirbekov jáne Ásel Sákenova.
- 60+: Alekseı Abramenko.
Áıelder arasynda keıbir jas sanattarynda qatysýshylar bolmady.
Giro d’Almaty-2025 jarysynyń absolıýtti chempıondary Anastasııa Volchanskaıa men Evgenıı Sladkov boldy.
Almatylyq Anastasııa Evtýshenko jetistik syryn aıtty.
— Men ekinshi jyl qatarynan kásibı jattyqtyrýshymen birge Sundaybike áýesqoılar komandasynda jattyǵyp kelemin. Negizgi ereje — kúshti durys bólý. Bastapqyda tym jyldam emes, birtindep qarqyn qosý kerek. Ár jarysta ýaqytymdy jaqsartýǵa tyrysamyn, — dedi Anastasııa Evtýshenko.
Óz jas sanatynyń jeńimpazy, halyqaralyq dárejedegi sport sheberi Alekseı Abramenko 67 jasta bolsa da, salaýatty ómir saltyn belsendi nasıhattap júr.
— Adamnyń jasy sportpen aınalysýǵa kedergi emes. Barshańyzdy belsendi ómir saltyn ustanýǵa shaqyramyn. Qozǵalys — bul ómir, — dedi ol.
Kórermenderdiń nazaryna 79 jastaǵy qatysýshy Jeńisgúl Ospanova ıe boldy. Ol bul saıys arqyly rýhtyń myqtylyǵyn jáne jeńiske degen jigerin kórsetti. Tabandylyǵy men shabyt bergeni úshin oǵan arnaıy syılyq tabys etildi. Ol «Jeńiske degen jigeri úshin» nomınatsııasymen marapattaldy.
Aıta keteıik, byltyr Astana kúnine oraı ótken velosherýge 700-ge jýyq áýesqoı sportshy qatysty.