Almatydaǵy eki balabaqsha memleket menshigine qaıtarylady
ALMATY. KAZINFORM – Almatynyń memlekettik aktıvter basqarmasy birneshe nysandy qalanyń menshigine qaıtarmaq.
Bul týraly Almaty qalasynyń memlekettik aktıvter basqarma basshysynyń orynbasary Jantóre Aıtjanov málimdedi.
Onyń aıtýynsha, 2002 jyldan bastap 11 jekemenshik pen arnaýly orta bilim berý mekemesine, atap aıtqanda «Aq nıet», «Elko», «Lıder», «Araı», «Magıstr», «Senim», «Kásipkerler mektebi», «Kógildir jelken», «Teremok», «Aıgerim» men Almaty menedjment jáne servıs kolledjine 10 balabaqsha men bir kombınat ǵımaraty jalǵa berilgen.
2020 jyldyń mamyr aıynda qala basshylyǵy jeke uıymdarmen jasalǵan múlikti jalǵa berý sharttaryn kezeń-kezeńimen buzý týraly sheshim qabyldaǵan. Al 2023 jyldyń maýsym aıynda «Araı» men «Senim» mekemesine nysandardy qaıtarý týraly resmı habarlama joldanyp, shilde aıynda aradaǵy jalǵa alý sharty buzylǵanymen, olar nysandy bosatýdan bas tartqan.
– Almaty qalasynyń Memlekettik aktıvter basqarmasy Almaty qalasynyń Mamandandyrylǵan aýdanaralyq ekonomıkalyq sotyna talap aryz berip, sot talapty qanaǵattandyrdy. Sottyń sheshimine qaramastan, «Araı» men «Senim» mekemesiniń qyzmetkerleri bul nysandarda áli otyr. Almatydaǵy Ádilet departamentine olardy májbúrlep shyǵarý materıaly tapsyryldy. «Araı» mekemesi ǵımaratty 2025 jylǵy 1 qyrkúıekke deıin bosatýdy keıinge shegerýin suraǵanymen, 3 shildede ótken sot oǵan kelisken joq. Quqyqtyq rásim aıasynda 2025 jylǵy 14 pen 15 shildede Almaty qalasynyń Ádilet departamenti jańaǵy mekemelerdi nysannan shyǵara bastamaq, - dedi Jantóre Aıtjanov.
Eske salaıyq, buǵan deıin Almatyda quny 2,6 mlrd teńge bolatyn Baspalar úıi memleket menshigine qaıtaryldy.