Almatydaǵy «Baısat» bazaryn satyp alýǵa eshkim nıet bildirmedi

ALMATY. KAZINFORM – E-Qazyna portalynda «Baısat» kóterme-bólshek saýda ortalyǵynyń saýdasy ótpedi.

Aýktsıon búgin saǵat 10:00-de ótýi kerek bolǵan. Alaıda saýda-sattyq bastalǵan sátte satý nysany boıynsha tirkelgen qatysýshylar joq bolǵandyqtan, aýktsıon toqtady. Bazardyń bastapqy baǵasy – 28 639 882 000,00 teńge boldy.

Buǵan deıin bazardy «Qaıtarylǵan aktıvterdi basqarý kompanııasy» satylymǵa shyǵarǵanyn jazǵanbyz.

Eske salaıyq, 2024 jyldyń qańtarynda Qaırat Satybaldynyń ulyna tıesili «Baısat» bazarynyń bir bóligi memleketke qaıtaryldy. Almaty qalasynyń mamandandyrylǵan aýdanaralyq ekonomıkalyq soty «Almaty jylý» holdıng kesheniniń (qazirgi «Baısat» bazary) múlkimen jasalǵan barlyq mámileni jaramsyz dep taný týraly sheshim shyǵardy.

Oǵan deıin sotqa deıingi tergeý aıasynda Qaırat Satybaldy «Baısat» bazarynyń basym bóligin óz erkimen qaıtaryp bergen bolatyn.