Almatyda jańa kópirde qozǵalys ashyldy
ALMATY. KAZINFORM – Almatynyń Jetisý aýdanynda qurylysy osy jyldyń tamyz aıynda bastalǵan kópirdiń tehnıkalyq ashylýy ótti.
Esterińizge sala keteıik, buǵan deıin megapolıs basshysy Erbolat Dosaevtyń tapsyrmasy boıynsha kópir boıyndaǵy apatty jaǵdaıǵa saldarynan qozǵalys jabylyp, jańasyn salý týraly sheshim qabyldanǵan bolatyn.
Bir aralyqty tıptegi jańa kópir qurylymy qysqa merzimde-shamamen 4 aıda turǵyzyldy. Jumystyń birinshi kezeńi aıasynda apattyq kópirdi bólshekteý, ınjenerlik jelilerdi qaıta qurý, 29 metrlik burǵylaý qadalaryn montajdaý, tirekter men tirek jelilerin ornatý júrgizildi.
– Salynǵan kópir eskiden eki ese uzyn: 16,8 metrge qarsy 33 metr. Sondaı-aq eni 8,5-ten 14,5 metrge deıin ulǵaıtyldy, júris bóliginiń eki jaǵynda árqaısysy 1,5 metr jaıaý júrginshiler trotýary uıymdastyryldy. Jańa kópir tolyǵymen aıaqtaldy jáne barlyq erejelerge saı salynǵan. Ol avtokólik júrgizýshileri men jaıaý júrginshiler úshin qaýipsiz qozǵalysqa kepildik bere otyryp, barlyq qajetti tekserýler men synaqtardan ótti,– dep atap ótti ákimdikten.
Qazir ózen arnasyn nyǵaıtý jáne jaryqtandyrýdy qamtıtyn abattandyrý jumystary jalǵasyp jatyr. Budan basqa, ózen arnasyn tehnıka úshin ýaqytsha negizden tazartý júrgiziletin bolady. Bul jumystardy osy aıdyń sońyna deıin júrgizý josparda.
Ótken ǵasyrdyń 1960-shy jyldary salynǵan kópir qurylymy eshqashan jóndelmegen jáne jaramsyz bolyp qalǵan.
Esterińizge sala keteıik, jańa kópir salý boıynsha jóndeý jumystary aıaqtalǵanǵa deıin atalǵan ýchaskeni aınalyp ótý Muhamedjan Seralın kóshesi arqyly qamtamasyz etildi.