Almatyda jańa avtobýs baǵyty ashylady

ALMATY. KAZINFORM — Almatyda bıyl 27 qarashadan bastap «Sport saraıy — Medeý sport kesheni» baǵyty boıynsha jańa, turaqty № 21 avtobýs marshrýty iske qosylady. 

Almatynyń jol qozǵalysy jáne jolaýshylar kóligin uıymdastyrý basqarmasynyń málimetinshe, baǵyttyń jalpy uzyndyǵy — 33,6 shaqyrym.

Baǵytqa «Almatyelektrotrans» JShS qyzmet kórsetedi. Kún saıyn 15 avtobýs jolaýshylardy tasymaldaýǵa shyǵady, qozǵalys aralyǵy — 8 mınýt. Paıdalanylatyn kólik — úlken syıymdylyqtaǵy avtobýstar: 28 otyratyn jáne 85 túregep turatyn oryn, bul tanymal týrıstik ári sporttyq baǵytta jolaýshylar tasymaldaýǵa múmkindik beredi.

— Avtobýstar beınebaqylaý júıesimen, salqyndatqyshpen jáne mobıldi qurylǵylardy qýattaýǵa arnalǵan USB-uıashyqtarmen jabdyqtalǵan. Júrgizýshi kabınasyna zamanaýı elektrondy júıe ornatylǵan, onyń ishinde júrgizýshiniń sharshaǵandyǵyn jáne is-áreketin baqylaıtyn DMS júıesi bar, — delingen habarlamada.

Salonda aıaldamalardy avtomatty túrde jarııalaý júıesi jumys isteıdi. Avtomattandyrylǵan habarlaý júıesin qoldaný jolaýshylardyń jaılylyǵyn arttyryp, erekshe qajettiligi bar adamdar úshin qoljetimdilikti jaqsartady jáne qajetti aıaldamadan ótip ketý jaǵdaıyn azaıtý arqyly qaýipsizdikti kúsheıtedi.

Eske salaıyq, buǵan deıin Almatyda zamanaýı elektroavtobýstar qyzmet kórsetetin jańa № 90 avtobýs baǵyty jumysyn bastaǵanyn jazǵanbyz.