Almatyda úshem dúnıege keldi

ALMATY. KAZINFORM - Almaty qalasynyń №2 qalalyq perınataldyq ortalyǵynda úshem dúnıege keldi.

Úshemniń anasy — 38 jasta. Onyń 2013, 2018 jáne 2019 jylǵy úsh balasy bar. Al kúni keshe dúnıege esigin ashqan úsh qyzdyń salmaqtary — 1970, 1990 jáne 1969 gramm.

«ÝDZ dárigeri mende úsh embrıon bar degende tań qaldym. Bizdiń áýletimizde ájemniń tarapynda egizder bolǵan, biraq eshkimde úshem bolǵan emes», — dep bólisti baqytty ana.

Al № 2 qalalyq perınataldyq ortalyqtyń neonatologııa bóliminiń meńgerýshisi Sarbas Aınurym sábılerdiń qazirgi jaǵdaıy jaqsy ekenin aıtty.

— Sábıler dúnıege kelgennen keıin olar reanımatsııa bóliminde birneshe kún jatyp, qajetti em aldy. Qazir olar anasymen birge palataǵa aýystyryldy, ózderin jaqsy sezinedi», — dedi neonatologııa bóliminiń meńgerýshisi Sarbas Aınurym.

Aıta ketken jón, 2024 jyldyń 10 aıynda Almatyda barlyǵy 39 750 bala dúnıege kelse, onyń 445-i egiz, 8-i úshem.