Almatyda «Úmit shýaǵy» kórmesi ótip jatyr
ALMATY. KAZINFORM – Almatyda qazaqstandyq sýretshi Gúlnur Muqajanovanyń ekinshi jeke kórmesi ashyldy.
Gúlnur Muqajanovanyń ózi Berlınde turady. Qolóner sheberi kıizben jumys isteıdi. Túrli-tústi jún men jibekten jasalǵan kıizdi qoldana otyryp, tekstýra jáne keńistikti naǵyz sheberlikpen úılestirilgen kúrdeli kompozıtsııalardy jasaıdy.
«Úmit shýaǵy» dep atalatyn kórmege 20-ǵa jýyq jumysy qoıyldy. Kelýshiler, ásirese, kıizden jasalǵan týyndysyna qyzyǵýshylyq tanytyp jatyr.
«Úmit shýaǵy» kórmesi – bul qalyptasqan ári qazirgi zamanǵy Qazaqstanǵa degen synı kózqaras týrasynda. Bul kórme – jeke joba emes, bul meniń mán-maǵyna izdeý jolyndaǵy tájirıbemniń bir bóligi. Óz jumystarym arqyly men úmit týraly aıtyp otyramyn, óıtkeni eshnársege qaramastan, sol úmitti joǵaltqym kelmeıdi», – deıdi Gúlnur Muqajanova.
Almatydaǵy kórme úshin Gúlnur óziniń 16 metrlik kıiz sýretiniń jalǵasyn jasap shyǵardy. Onda elimizdiń ótkeni, búgini jáne bolashaǵy ártúrli túster arqyly óriledi. Aldymen sýreti salynyp, odan keıin ústine kıiz túsken.Taqyrypty taǵy 16 kartına jalǵaıdy. Osylaı ınstallıatsııanyń uzyndyǵy 41 metrge jetken.
«Meniń shyǵarmashylyǵym elime arnalǵan. Ata-babalarymyzdan jetken baı murany álemge tanytqym keledi. Túsine bilgen adamǵa árqaısysynda maǵyna jatyr. Árbiri mádenıetimizben salt-dástúrimizden habar beredi. Shet jerde bolsyn, osynda bolsyn, qyzyǵýshylyq tanytyp, surap jatady»,- dedi ol.
Galereıa dırektory Merýert Qalıevanyń aıtýynsha, jumys kúrdeli jáne erekshe.
«Sýretshi kıizdi ınstallıatsııa deńgeıine jetkize bildi. Túrli-tústi jún men matany, terini qoldana otyryp jasalǵan kúrdeli kompozıtsııalardyń boıaýy erekshe. Bir tústen kelesi túske ótýde ózindik qoltańba qalyptastyrǵan. Osyndaı shyǵarmalar arqyly halqymyzdyń tarıhy men mádenıeti saqtalady», – dedi ol.
Jas sýretshi buǵan deıin Gonkong, Berlın, London, Venetsııa sııaqty birneshe qalada ótken úlken kórmelerge qatysqan.
