Almatyda týberkýlezdi emdeýdiń tyń tásili qolǵa alyndy

ALMATY. KAZINFORM – 2024 jyly Almatyda týberkýlezdi emdeý boıynsha pılottyq joba iske qosyldy. Bul týraly óńirlik kommýnıkatsııalar qyzmetiniń alańynda ótken brıfıngte qalalyq Ftızıopýlmonologııa ortalyǵynyń dırektory Janar Sápıeva málim etti.

Spıkerdiń sózinshe, týberkýlezdi emdeýdegi mańyzdy jetistik emdeý uzaqtyǵyn qysqartý. Sońǵy on jylda tájirıbege týberkýlezge qarsy jańa preparattar men qysqa merzimdi emdeý rejımderi engizildi, bul emdeý uzaqtyǵyn aldyńǵy 20-24 aıdyń ornyna 6-9 aıǵa deıin qysqartýǵa múmkindik beredi.

Osylaısha, 2024 jyly Almaty qalasy emdeýdiń jańa rejımderin pılottyq jobaǵa engizdi. Qazir 11 patsıent jańa tásil boıynsha em alyp jatyr.

«Bul qala turǵyndary arasynda týberkýlezben syrqattanýshylyq pen ólim-jitimdi azaıtýǵa kómektesedi. Almaty qalasynyń ákimdigi týberkýlezben aýyratyn 922 naýqasqa 41 400 teńgeden aı saıynǵy aqshalaı tólemder túrinde qarajat bóldi. Úkimettik emes uıymdardyń qarajaty arqyly 63 naýqasqa jol júrý bıletteri, azyq-túlik dorbasy jáne taǵy basqa kómek kórsetildi», - dedi Janar Sápıeva.

Budan bólek, týberkýlezge qarsy is-sharalardyń sapasyn jaqsartý maqsatynda ftızıopýlmonologııa ortalyǵy qalanyń barlyq medıtsınalyq uıymynda, onyń ishinde jeke medıtsınalyq ortalyqtarda turaqty túrde monıtorıng júrgizedi.

«Ftızıopýlmonologııa ortalyǵynyń bazasynda MSAK uıymynyń medıtsına qyzmetkerlerin týberkýlezdi anyqtaý, dıagnostıkalaý jáne emdeý máseleleri boıynsha oqytý júrgiziledi jáne 2023 jyly MSAK uıymdarynyń 2 169 mamany oqytyldy, onyń ishinde 975 dáriger bar», - dedi ol.