Almatyda Táýelsizdik kúnine oraı qandaı is-sharalar ótedi

ALMATY. KAZINFORM – Almatyda Táýelsizdik kúni men Jeltoqsan oqıǵasynyń 39 jyldyǵyna arnalǵan is-sharalar jospary bekitildi. 

Qala ákimdiginiń málimetinshe, 16-17 jeltoqsan qarsańynda memlekettik mekemelerde, qala kitaphanalary men bilim berý uıymdarynda taqyryptyq kezdesýler, patrıottyq jáne ádebı-mýzykalyq keshter, dóńgelek ústelder, tarıhı-tanymdyq saǵattar, dárister, ádebı oqýlar jáne basqa da mańyzdy datalarǵa arnalǵan is-sharalar ótedi.

Osy kúnderi Respýblıka alańyndaǵy Táýelsizdik monýmentine jáne «Táýelsizdik tańy» eskertkishine dástúrli gúl qoıylady. Oǵan qala basshylyǵy, máslıhat depýtattary, Qoǵamdyq keńes músheleri, 1986 jylǵy oqıǵaǵa qatysýshylar, etnomádenı birlestikter ókilderi jáne jastar qatysady.

17 jeltoqsanda qalanyń barlyq segiz aýdanynda 1986 jylǵy Jeltoqsan oqıǵasynda qaza bolǵandardy eske alýǵa arnalǵan as beriledi.

Buǵan qosa, qala tórt memlekettik áleýmettik jobany júzege asyryp jatyr. Atalǵan jobalar aıasynda qaıyrymdylyq aktsııalary, sporttyq týrnırler, shyǵarmashylyq jáne patrıottyq is-sharalar, taqyryptyq konferentsııalar men baıqaýlar ótkizý josparlanǵan.

Eske salaıyq, buǵan deıin Astanada Táýelsizdik kúnine oraı qandaı is-sharalar ótetinin jazǵanbyz.