Almatyda taýda adasyp ketken týrıster qutqaryldy
ALMATY. KAZINFORM — Almaty taýlarynda qutqarýshylar Bashýt shyńynda adasyp ketken týrısterdi evakýatsııalady. Bul týraly TJM baspasóz qyzmeti habarlady.
Almaty taýlarynda qutqarýshylar Bashýt shyńynan túsý kezinde adasyp ketken týrıster tobyn izdestirý operatsııasyn júrgizdi.
— Tórt adam baǵdaryn joǵaltyp, soqpaqqa óz betinshe shyǵa almaǵan. Barlyq qatysýshylardyń qara kıim kıgendigi jaǵdaıdy qıyndatyp jiberdi, sondyqtan olardy qarańǵy kezde baıqaý qıyn boldy, — delingen aqparatta.
Kómekke TJM Qutqarý qyzmetiniń kezekshi toby shyqty. «Shymbulaq» taý shańǵysy kýrortyna jetken qutqarýshylar jol boıymen «Shymbulaq» ózenine qaraı bet alyp týrısterdi tapty.
Qutqarýshylar topty tómen shyǵaryp salyp, «Shymbulaq» turaǵyna jetkizdi. Olar medıtsınalyq kómekke muqtaj bolǵan joq.
Buǵan deıin Qarqaraly taýlarynda adasyp ketken týrıster qutqarylǵan bolatyn.
