Almatyda taǵy bir turǵyn úı kesheni súrilip jatyr

ALMATY. KAZINFORM — Almatynyń Qala qurylysyn baqylaý basqarmasy «Qaraǵaıly» shaǵyn aýdanynda ornalasqan turǵyn úı keshenin buzý jumystarynyń bastalǵanyn habarlady.

Vedomstvo málimetinshe, jospardan tys tekserý barysynda nysan sáýlet-jobalaý tapsyrmasy alynbastan jáne joba eskızi kelispesten, qurylys-montaj jumystaryn bastaý týraly habarlamasyz jáne tıisti saraptamasyz salǵany anyqtalǵan.

— Tapsyrys berýshige qatysty ákimshilik sharalar qoldanylyp, Almaty qalasynyń Mamandandyrylǵan aýdanaralyq ekonomıkalyq sotyna ǵımaratty súrý týraly talap-aryz berildi, — dep habarlady basqarmadan.

2023 jyldyń 26 shildesinde Almaty qalasynyń Mamandandyrylǵan aýdanaralyq ekonomıkalyq soty bul talapty qanaǵattandyrǵan. 2023 jyldyń 26 qazanynda Almaty qalalyq soty birinshi satydaǵy sheshimdi ózgerissiz qaldyrdy. 2024 jyldyń 30 qańtarynda atqarý paraǵy Almatynyń Ádilet departamentine joldanyp, atqarýshylyq is qozǵaldy.

Qazirgi ýaqytta sot oryndaýshylarynyń qatysýymen nysandy súrý jumystary bastalǵan.

Aıta ketken jón, Almatyda ótken jyldyń basynan beri 55 zańsyz nysan, onyń ishinde «Mechta», KHAN, «Alma Garden» turǵyn úı keshenderi jáne basqa da nysandar tolyq nemese jartylaı súrildi.

Eske salaıyq, buǵan deıin Almatyda tektonıkalyq jaryqshaqtarda ornalasqan 71 úı buzylatynyn jazǵanbyz.