Almatyda Saıran kóline qonǵan aqqutan oqqa ushty
ALMATY. KAZINFORM – Saıran kóline qonǵan aqqutandardyń bireýine oq atyldy. Bul týraly zooqorǵaýshy Natalııa Sýljık Facebook-tegi paraqshasynda jazdy.
«Bul qus Qyzyl kitapqa engen aqqutan bolyp shyqty. Qanatyn oq tesip ótken. Keýdesi jyrtylǵan. Biz taksımen ony «Aıbolıtke» jetkizdik. Aıaqtary da synǵan sekildi. Bul jaǵdaı qalaı bolǵanyn bilmeımin. Baıǵus qus qaıyrymdy adamdardyń ortasyna tústi, olar qusty jyly jerge ákelgen soń, maǵan habarlasty», - dep jazdy Natalııa Sýljık.
Alaıda veterınarlar men zooqorǵaýshylar qusty aman alyp qala almady.
Eske salaıyq, Qazaqstandyq fotograf Dmıtrıı Dotsenko Saıran kóline qonǵan aqqutan men jabaıy úırekterdiń sýretterin jarııalaǵan edi. Ol sondaı-aq balyq tistep turǵan aqqutandy sýretke túsirgen bolatyn.
«Bul - bizdiń Alataýdyń endemık balyǵy. Sondyqtan men de óte qundy sýret túsirdim. Oılap qarańyzshy, 2024 jyly eki mıllıon turǵyny bar megapolıstiń qaq ortasynda endemık naǵyz jabaıy tabıǵatty kóre alasyz. Bul - ǵajap nárse, ony qorǵaý kerek», - dep jazǵan bolatyn almatylyq fotograf Instagram-daǵy paraqshasynda.
Aıta keteıik, 1971 jyldan beri Almatyda alǵash ret Almaty ákimi Erbolat Dosaevtyń tapsyrmasymen Saıran kóli tazartyldy. Kóldiń túbinen jáne jaǵasynan 140 myń tekshe metrden astam qoqys pen laı shyǵarylǵanyn habarlaǵanbyz.
