Almatyda pırotehnıkanyń zańsyz satylymy tekserilip jatyr

ALMATY. KAZINFORM — Almatyda mereke qarsańynda pırotehnıkany saýdasyna baqylaý kúsheıdi.

Almaty qalasy TJD Memlekettik órt baqylaý basqarmasynyń bas mamany Rýslan Qasenov jyl saıyn mereke kúnderi qalada orta eseppen 13 órt tirkeletinin aıtty. Onyń 15 paıyzy pırotehnıkadan shyǵady.

— Pırotehnıkany qoldanǵanda qarapaıym qaýipsizdik talaptaryn saqtamaýdan órt shyǵady ne adamdar jaraqat alady. Keıingi 5 jylda Almatyda jańa jyldyq kezeńde 68 órt tirkelse, sonyń 10-y pırotehnıkany saldarynan boldy, — dedi ol.

Onyń aıtýynsha, 2025 jyldyń 5 jeltoqsanynan bastap 2026 jyldyń 3 qańtaryna deıin ruqsatsyz saýda men qaýipti ónimderdi anyqtaý maqsatynda pırotehnıkalyq ónimderdi saqtap, satatyn oryndarǵa reıd júrgizilip jatyr.

Qazirgi ýaqytta polıtsııa qyzmetkerlerimen birlese júrgizilgen reıd nátıjesinde QR ÁQBtK-niń 196-baby boıynsha 10 ákimshilik hattama toltyrylǵan. Sondaı-aq zańsyz satylǵan pırotehnıkalyq ónimder tárkilenip, onyń bir bóligi belgilengen tártippen mórlendi.

Tótenshe jaǵdaılar departamenti eskertedi:

— Pırotehnıkany jylý men ylǵaldan aýlaqtaý jerde saqtaý qajet;
— Іske qosar kezde 16 jasqa tolmaǵan balalardy aýlaq ustap, buıymnyń ústinen tónip qaraýǵa, qatty jel kezinde ushyryp, janbaı qalǵan bilteni qaıta jaǵýǵa qatań tyıym salynady;
— Feıerverk atatyn jer turǵyn úıden kemi 50 metr alystaý bolýy tıis, jaqyn mańda aǵash, elektr berý jelisi men basqa da kedergi bolmaýy kerek.

Eske salaıyq, byltyr Almatyda «103» pýltine jańa jyldyq mereke kúnderi 23 myńnan astam shaqyrtý kelip túsken. Onyń 16 myńyna jedel járdem brıgadalary qyzmet kórsetti. 186 brıgada tartyldy, onda 500-den astam qyzmetker jumys istedi.