Almatyda órt sóndirýshilerdiń oqý-jattyǵýy ótti
ALMATY. KAZINFORM — Órt sóndirýshiler 35 qabatty ǵımaratta órt-taktıkalyq oqý-jattyǵý ótkizdi.
Órt-taktıkalyq oqý-jattyǵýdyń maqsaty — kóp qabatty ǵımarattardyń joǵarǵy qabattaryna órt sóndirgish zattardy berý jáne jeke quramnyń daıyndyǵyn arttyrý.
Órt-taktıkalyq oqý-jattyǵýlardyń baqylaýshysy Reseı jáne Belarýs TJM mamandary boldy.
— Bul oqý-jattyǵýlar qalalardyń belsendi kópqabatty qurylysy jaǵdaıynda azamattyq qorǵaý kúshterin daıarlaý júıesiniń mańyzdy bóligi bolyp tabylady. Órt sóndirý jáne adamdardy qutqarý protsesine áýe tehnıkasynyń ıntegratsııasy erekshe mańyzǵa ıe, — dedi Tótenshe jaǵdaılar vıtse-mınıstri Ramıl Kamalov.
Oqý-jattyǵý josparyna sáıkes shartty órt 35 qabatty turǵyn úı kesheninde boldy. Jedel den qoıý jáne tótenshe jaǵdaıdy joıý maqsatynda ártúrli taktıkalyq quraldar, sonyń ishinde ónimdiligi joǵary sorǵylary bar mamandandyrylǵan avtomobılder, órt mototsıkl ekıpajdary, sondaı-aq áýe kúshteri-órt tikushaǵy tartyldy.
Áreket etýdiń negizgi quraldarynyń biri retinde avıatsııany qoldanýǵa erekshe nazar aýdaryldy. Áýe tehnıkasyn paıdalaný jer ústi jáne áýe kúshteriniń ózara árekettesý múmkindikterin baǵalaýǵa, sondaı-aq shartty oqıǵa ornynda jedel basqarýdyń tıimdiligin arttyrýǵa múmkindik berdi.
Oqý-jattyǵýǵa TJM, ІІM, kommýnaldyq qyzmetter men Almaty qalasynyń qutqarý qyzmeti bólimshelerinen 160-tan astam adam jáne 25 tehnıka jumyldyryldy.
Qazavıaqutqarý ushqyshtary adamdardy joǵarǵy qabattardan evakýatsııalaý boıynsha eń kúrdeli elementti pysyqtady, aerovızýaldy barlaý úshin ushqyshsyz ushý apparattary, temperatýralyq belsendirilgen sýdy berýge arnalǵan kópfýnktsıonaldy mashına, ónimdiligi joǵary sorǵy qondyrǵylary qoldanyldy.
Buǵan deıin Almatyda turǵyn úı arasynda tikushaq ushyp júrgeni týraly jazǵanbyz.