Almatyda Medeýge baratyn avtobýstar jańardy

ALMATY. KAZINFORM – Qyzmet kórsetý sapasyn arttyrý maqsatynda 6 naýryzdan bastap  №12 baǵytta Temirjol vokzaly-2  men «Medeý» BTK qatynaıtyn avtobýstar tolyq jańardy.

Almaty ákimdiginiń málimetinshe, Yutong markaly gazben júretin 12 metrlik jańa avtobýstar zamanaýı jabdyqpen jabdyqtalǵan. Atap aıtar bolsaq, aýabaptaǵysh, beınebaqylaý júıeleri jáne telefondardy zarıadtaýǵa arnalǵan USB konnektorlar bar. Sonymen qatar salonǵa aıaldamalardy kórsetetin aqparattyq dıspleı ornatylǵan.

Al, burynǵy avtobýstar basqa baǵyttardy kúsheıtýge baǵyttalmaq. 

Esterińizge sala keteıik, byltyr megapolıs basshysy Erbolat Dosaevtyń tapsyrmasy boıynsha ákimdik 600 avtobýs pen 100 trolleıbýs satyp alyp, 22 jańa baǵyt, onyń ishinde 10 qala mańyndaǵy baǵyt uıymdastyryp, 50-ge jýyq eldi mekendi qamtydy. Bıyl taǵy 600 avtobýs, 100 trolleıbýs jáne 100 elektroavtobýs satyp alý josparǵa engizilgen.