Almatyda mamyr aıynan bastap sýburqaqtar iske qosylady
ALMATY. KAZINFORM – Qalada mamyr aıynyń basynan bastap sýburqaqtar kezeń-kezeńmen iske qosylady.
Almaty ákimdiginiń málimetinshe, sýburqaqtar 1 qazanǵa deıin kún saıyn saǵat 08:00-den 23:00-ge deıin jumys isteıdi. Aýa raıyna baılanysty olardyń jumysy retteledi. Temperatýra +5°C-tan tómendegen jaǵdaıda sýburqaqtar ýaqytsha toqtatylady.
Qoǵamdyq keńistikterdi damytý basqarmasy ókilderiniń málimetinshe, bıyl kommýnaldyq menshiktegi 55 sýburqaq keshenin iske qosý josparlanyp otyr. Barlyq nysannyń tehnıkalyq jáne sanıtarlyq jaǵdaıy tıisti qyzmetterdiń turaqty baqylaýynda bolady.
- Maýsymǵa daıyndyq jumystary aldyn ala júrgizildi. Mamandar sýburqaqtardyń tostaǵanyn jáne aınalasyndaǵy aýmaqtardy tazalap, sýdy zalalsyzdandyrdy, jabdyqtardy jóndep, syrlap, ınjenerlik júıelerge tolyq tekseris jasady. Bul olardyń maýsym boıy senimdi ári qaýipsiz jumys isteýin qamtamasyz etedi, - dep habarlady ákimdikten.
Eske salaıyq, buǵan deıin Almatyda 5,6 mlrd teńgege jóndelip jatqan 4 sýburqaq qashan iske qosylatynyn jazǵanbyz. Olar Almaty ákimdigi ǵımaratynyń shyǵys jáne batys jaǵynda, Respýblıka alańynda, sondaı-aq Ǵ.Músirepov teatry janynda ornalasqan.
Jańartylǵan málimette Almaty ákimdigi atalǵan jobalardy aıaqtaý jáne irgeles aýmaqtardy kórkeıtý 2026 jyly úshinshi toqsanǵa josparlanǵanyn atap ótti.
