Almatyda «Kúmbirle, qońyr dombyra» atty kórme ashyldy
ALMATY. KAZINFORM – Qazaqstan Respýblıkasy Memlekettik ortalyq mýzeıinde Ulttyq dombyra kúnine arnalǵan «Kúmbirle, qońyr dombyra» atty aýqymdy is-shara ótti.
Bul aıtýly mereke halqymyzdyń baı murasyn, rýhanı qundylyqtaryn dáriptep, ulttyq ónerge degen súıispenshilikti arttyrýǵa baǵyttalǵan.
Kórme kezinde kórermen nazaryna mýzeı qorynda saqtalǵan halqymyzdyń rýhanı qazynasyn baıytqan kórnekti tulǵalarǵa tıesili dombyralar usynyldy. Olardyń qatarynda halyq ánshisi, kompozıtor Jaıaý Musa, uly Abaıdyń jary Dilda Alshynbaıqyzy, án óneriniń sheberi Ámire Qashaýbaev, mýzyka zertteýshisi, kompozıtor jáne dırıjer Ahmet Jubanov, qazaq opera óneriniń negizin qalaýshylardyń biri Kúlásh Baıseıitova, akademık Qanysh Sátbaev, teatr óneriniń tarlany Elýbaı Ómirzaqov, sondaı-aq Juban Moldaǵalıev, Káýken Kenjetaev, Ábdilda Jangeldın, Qapan Qasymov jáne basqa da birtýar óner qaıratkeriniń dombyralary bar.
Sondaı-aq is-shara barysynda «Aqjaýyn» memlekettik kameralyq orkestri men «Serper», «Jiger» dombyrashylar ansamblderi óner kórsetip, tyńdarmannyń qulaq quryshyn qandyrdy. Bul keshte óner kórsetken talantty búldirshinder kúıshi, Qazaqstannyń Halyq ártisi Seken Turysbekten bata aldy.
Sonymen qatar Seken Turysbek óziniń 30 jyl boıy shyǵarmashylyq serigine aınalǵan dombyrasyn mýzeı qoryna tabystady. Kórme aıasynda kúıshilerdiń sheberlik saǵattary ótip, ulttyq kıim úlgileri usynyldy.
Buǵan deıin Astanada qala kúni merekesine oraı qolónershilerdiń kórme-jármeńkesi ótetinin habarlaǵan edik.