Almatyda kommýnaldyq tarıfter sýbsıdııalanady – Erbolat Dosaev
ALMATY. KAZINFORM – Almatyda halyqtyń áleýmettik osal tobyna kommýnaldyq qyzmet tarıfterdiń kóterilýine baılanysty ótemaqy tólenedi. Oǵan qarajat qalalyq bıýdjetten bólinedi. Bul týraly Erbolat Dosaev Áýezov aýdanynyń turǵyndarymen kezdesýi barysynda eske saldy.

– Qoldaýǵa muqtaj turǵyndarǵa arnalǵan arnaıy baǵdarlama qalada eki jyldan astam ýaqyt buryn iske qosylǵan. Áleýmettik osal sanattaǵy azamattar aýdandyq basqarmalarǵa júginip, qajetti kómek ala alady. Bul maqsatqa qarajat bıýdjette qarastyrylǵan, – dedi Erbolat Dosaev.
Qala basshysy qazirgi kommýnaldyq tarıfter áli de aıtarlyqtaı sýbsıdııalanatynyn atap ótti.
Ákimdikke sýdy tutyný boıynsha saralanǵan tólemge qatysty kóptegen suraq kelip túsedi.
– Ókinishke qaraı, qalada sý eseptegish qurylǵylary joq turǵyndardyń úlesi joǵary. Sondyqtan biz saralanǵan tólem júıesin engizdik: eseptegishi barlar bir tarıfpen tóleıdi, al eseptegishi joqtar kóterilgen norma boıynsha eseptesedi. Bul arqyly biz turǵyndardy eseptegish ornatýǵa yntalandyrǵymyz keldi, – dedi ákim.
Sonymen qatar, qala basshysy Almaty jylý jelilerimen birlesip, kópqabatty úılerdegi jylý esepteý toraptaryn jańǵyrtý baǵdarlamasy bastalǵanyn aıtty.
Bıyl 141 700 almatylyqqa kommýnaldyq qyzmet aqysyn tóleýge 25 myń teńgeden beriledi.
Eske salaıyq, buǵan deıin Almatyda jylý men ystyq sý baǵasy nelikten óskenin jazǵanbyz.