Almatyda kókjótelmen aýyrǵandar kóbeıgen

ALMATY. KAZINFORM — Almaty qalasynyń sanıtarııalyq-epıdemıologııalyq baqylaý departamentiniń málimetine sáıkes, megapolıste 5 aıda ekpe almaǵan 14 jasqa deıingi balalar arasynda kókjóteldiń 62 rastalǵan jaǵdaıy tirkelgen. Sondaı-aq naýqastarmen baılanysta bolǵan 334 adam tekserildi, olar indet juqtyrmaǵan. 

Almaty qalasynyń sanıtarııalyq-epıdemıologııalyq baqylaý departamentiniń basshysy Qasymhan Alpysbaıuly atalǵan aýrý aýa arqyly taraıtynyny aıtty.

— Kókjótel — Bordetella pertussis taıaqshasynan týyndaǵan, qusýmen jáne qalyń tutqyr qaqyryqty bólýmen sıpattalatyn qalshyldatqan jóteldiń erekshe shabýyldarymen sıpattalatyn jedel respıratorlyq bakterııalyq juqpa. Kókjóteldiń qozdyrǵyshy aýa tamshylarymen naýqas jótelgende, túshkirgende, sóıleskende taralady, — dedi ol.

Sondaı-aq SEB basshysy kókjóteldiń asqynýy ókpeniń qabynýy (pnevmonııa), mıdyń zaqymdanýy sııaqty aýrýlarǵa alyp kelýi múmkin ekenin atap ótti.

Onyń aıtýynsha, aýrý ásirese birneshe aılyq sábılerge aýyr soǵady.

— Birinshiden, balada qarapaıym sýyqtyń belgileri paıda bolady: murynnyń aǵýy, bezgek, qalypty jótel. Birte-birte jótel kúsheıip, ustamaly jótelge aınalady. Osy álsiretetin jótel ustamasy kezinde mıdyń qan aınalymy buzylady, ottegi ashyǵýy nátıjesinde psıhıkanyń buzylýy jáne ártúrli dárejedegi aqyl-oı kemistigi paıda bolady. Kókjótelden qorǵaýdyń jalǵyz senimdi jáne tıimdi ádisi — vaktsınatsııa, — dedi Qasymhan Alpysbaıuly.

Aıta ketken jón, SEB departamenti tarapynan aýrýdyń belgileri paıda bolǵan kezde mynandaı keńes beriledi:

— ýaqtyly medıtsınalyq kómekke júginý, ózin-ózi emdemeý, tek dárigerdiń nusqaýy boıynsha em qabyldaý;
— bólmeni jıi jeldetip, dymqyl tazalaý júrgizý;
— jótelgen kezde aýyzdy jabý, qoldy jıi jýý;
— ata-analarǵa naýqas balalardy uıymdasqan ujymdarǵa, mektep pen balabaqshaǵa jibermeý.