Almatyda qoǵamdyq kólikte jol júrý aqysy ózgeredi
ALMATY. KAZINFORM - Almatyda qoǵamdyq kólikte jol júrý aqysy 20 teńgege kóterilýi múmkin. Qala ákimdiginiń qaýly jobasy qoǵammen talqylaný úshin «Ashyq NQA» saıtynda jarııalandy.
Qalalyq mobıldilik basqarmasy málim etkendeı, 80 teńgelik tarıf 2011 jyldan beri ózgermedi, tek byltyr ǵana 20 teńgege ósti. Qazir Almatyda qoǵamdyq kóliktegi tarıftiń quny qolma-qol aqshasyz tásilmen tólegen kezde 100 teńge, al qolma-qol tólegen kezde 200 teńge mólsherinde belgilengen.
Bul rette, vedomstvo osy jyly qoǵamdyq kólikte jol júrý úshin ortasha tarıf 310 teńge, al keıbir marshrýtta 400 teńgege jetetinin atap ótti. Osyǵan baılanysty jyl saıyn tasymaldaýshylarǵa tólenetin sýbsıdııa mólsheri ósýde.
Eger 2023 jyly 68,7 mlrd teńge bólinse, 2024 jyly sýbsıdııanyń boljamdy somasy 97,3 mlrd teńgege deıin artty. Osylaısha, qazirgi tarıf boıynsha sýbsıdııalaý mólsheri únemi ósip otyrady, bul jergilikti bıýdjet úshin shamadan tys bolýy múmkin.
«Qala tasymaldaýshylary qoldanystaǵy tarıf tasymaldaýshylardyń avtobýs satyp alýǵa, jańartýǵa jáne ýaqytyly qyzmet kórsetýge, sondaı-aq júrgizýshilerdiń jalaqysyn kóterýge jumsaǵan shyǵyndy ótemeıdi dep birneshe ret málimdedi. Tasymaldaýshylarǵa jáne jergilikti bıýdjetke júktemeni ishinara azaıtý maqsatynda qalalyq qatynastarda jolaýshylar men bagajdy avtomobılmen turaqty tasymaldaýǵa tarıf belgileý týraly qala ákimdigi qaýlysynyń jobasy daıyndaldy. Joba jol júrý tarıfin 120 teńgege deıin kóterýdi kózdeıdi. Tıisinshe, azamattardyń jeńildetilgen sanattary úshin jol júrý quny tarıftiń 50%-y bolady», - delingen basqarmanyń habarlamasynda.
Sonymen qatar qoǵamdyq kólikte jolaýshylardyń qaýipsizdigin qamtamasyz etý maqsatynda jol júrý aqysyn qolma-qol aqshamen tóleýdi joıý kózdelgen. Qalalyq mobıldilik basqarmasy jańa tarıf kezinde sýbsıdııalaýdyń boljamdy kólemi 2024 jyly 7 mlrd teńgeden astamǵa qysqaratynyn jetkizdi.
«Bul qala turǵyndarynyń talabyn eskere otyryp, qoǵamdyq kólikte kóp júrýdi arttyrýǵa qosymsha qarjy jumsaýǵa yqpal etpek.Máselen, 2023 jyly qala ákimdigi 600 jańa avtobýs pen 100 trolleıbýs satyp aldy. Bıyl qosymsha 600 avtobýs, 100 trolleıbýs jáne 100 elektrobýs satyp alý josparlanǵan. Bul tehnıkalardy satyp alýǵa 160 mlrd. teńgeden astam qarajat bólindi. Buǵan qosa, jeke tasymaldaýshylar 2023 jyly 550 avtobýs, 2024 jyly 400-ge jýyq jańa avtobýs satyp alýdy josparlaǵan», - dep atap ótti basqarmadan.
Bıyl BRT, LRT jáne metro sııaqty jedel qoǵamdyq kólikti damytýdy kózdeıtin kólik ınfraqurylymyn sheber josparyn júzege asyrý bastaldy. 2030 jylǵa qaraı qalada uzyndyǵy shamamen 300 km bolatyn 42 kólik dálizi qurylady, bul qaladaǵy turǵyn úı aýmaǵynyń tórtten úsh bóligi. Sondaı-aq jolaqysyn tóleý jáne tegin tasymaldaýda tarıftik mázir ázirlenedi.
