Almatyda «Qazaqstan tarıhy» jeti tomdyq basylymynyń besinshi tomy bekitildi
ALMATY. KAZINFORM – Almatyda «Qazaqstan tarıhy: ejelgi dáýirden búginge deıin» jeti tomdyq akademııalyq basylymyn ázirleýge qatysty redaktsııa alqasynyń kezekti otyrysy ótti. Bul týraly Aqordanyń baspasóz qyzmeti habarlady.
Basqosýda HІH ǵasyr men HH ǵasyrdyń bastapqy kezeńindegi Qazaqstan tarıhyna arnalǵan besinshi tomnyń qoljazbasy qaraldy.
Redaktsııalyq alqa músheleriniń usynystary negizinde jańarǵan besinshi tomnyń qurylymy men mazmunyn avtorlar ujymynyń jetekshisi, tarıh ǵylymdarynyń doktory, Sh.Sh.Ýálıhanov atyndaǵy Tarıh jáne etnologııa ınstıtýtynyń dırektory, akademık Zııabek Qabyldınov tanystyrdy.
Redaktsııa alqasy besinshi tomnyń qoljazbasyn bekitip, baspaǵa daıyndaý týraly sheshim qabyldady. Sondaı-aq otyrysta akademııalyq basylymnyń keńestik kezeńdegi Qazaqstan tarıhyna arnalǵan altynshy tomynyń qoljazbasy qaraldy.
Atalǵan tomnyń tujyrymdamasyn, qurylymy men mazmunyn avtorlar ujymynyń jetekshisi, tarıh ǵylymdarynyń kandıdaty Kúlǵazıra Baltabaeva tanystyrdy.
Sonymen qatar tarıh ǵylymdarynyń doktory, professor Búrkitbaı Aıaǵannyń, áleýmenttaný ǵylymdarynyń doktory, Fılosofııa, saıasattaný jáne dintaný ınstıtýtynyń bas dırektory Aıgúl Sádýaqasovanyń, «Alternatıva» ózekti zertteýler ortalyǵynyń dırektory, saıası ǵylymdarynyń kandıdaty Andreı Chebotarevtiń retsenzııalary tyńdaldy.
Redaktsııa alqasynyń Dıhan Qamzabekuly, Erkin Ábil, Galına Ksenjık, Radık Temirǵalıev, Mámbet Qoıgeldıev, Hankeldi Ábjanov, Kenjehan Matyjanov, Orazaq Smaǵulov, Bereket Káribaev, Jaqsylyq Sábıtov, Aıbolat Kúshkimbaev, Nursan Álimbaı, Aıdos Sarym, Sábıt Shildebaı, Berik Ábdiǵalıuly, Mıhaıl Akýlov sekildi basqa da músheleri óz oı-pikirin ortaǵa saldy.
Redaktsııa alqasy akademııalyq basylymnyń altynshy tomyn qaraýdy kelesi otyrysta jalǵastyrý týraly sheshim qabyldady.
Budan buryn Memlekettik keńesshi Erlan Qarın Prezıdenttiń «Taza Qazaqstan» bastamasyn júzege asyrý máseleleri jóninde jıyn ótkizgenin jazǵan edik.
