Almatyda ınternetten nusqaý alyp, esirtki taratqan jas jigit ustaldy
ALMATY. KAZINFORM — Almatyda patrýldik polıtsııa qyzmetkerleri esirtki quraldaryn jasyryn taratyp júrgen kúdiktini qolǵa túsirdi.
Oqıǵa Almaly aýdanynda Qarasaı batyr men Jarokov kósheleriniń qıylysyna jaqyn mańdaǵy turǵyn úı aýlasynda bolǵan. Patrýldik ekıpaj jas jigittiń kúmándi áreketine nazar aýdaryp, ony tekserý barysynda untaq tárizdi zat salynǵan birneshe oramany anyqtaǵan.
Sot-hımııalyq saraptama qorytyndysy boıynsha tárkilengen zat sıntetıkalyq esirtki ekeni belgili boldy. Atalǵan fakti boıynsha Almaly aýdandyq polıtsııa basqarmasy qylmystyq is qozǵady.
20 jastaǵy kúdikti ýaqytsha ustaý ızolıatoryna qamaldy. Aldyn ala málimetke qaraǵanda, ol esirtkini «jasyryn qoıyp ketýshi» retinde ınternet arqyly tapsyrmalar alyp, jasyryn oryndardyń koordınattary men aqshalaı syıaqyny onlaın formatta alyp otyrǵan.
Qazirgi ýaqytta jedel bólimsheler zańsyz áreketti uıymdastyrǵan tulǵalardy anyqtaý jumystaryn júrgizip jatyr. Polıtsııa olar ustalyp, zańǵa sáıkes jazalatynyn habarlady.
Eske salaıyq, buǵan deıin Almatyda esirtkini jasyryn taratqan 29 jastaǵy kúdikti ustalǵanyn jazǵanbyz.