Almatyda elektrli velosıpedti jalǵa alǵandar ár mınýtyna tóleıdi
ALMATY. KAZINFORM — Almatyda aldaǵy ýaqytta velosıpedterdi jalǵa berýdiń jańa jobasy iske qosylady.
Almatyda birneshe jyldan beri Almaty Bike velosıpedterdi jalǵa berý qyzmeti toqtap tur. Osyǵan baılanysty buryn qalalyq mobıldilik basqarmasyna saýal joldaǵan edik.
Vedomstvo óz jaýabynda bul júıeni odan ári damytý «Almaty Parkıng» mekemesine júktelgenin habarlady.
Kazinform agenttigi bul máseleni taǵy da naqtylap, «Almaty Parkıng» mekemesine júgindi. Qalalyq mobıldilik basqarmasyna qarasty bul mekeme qazirgi tańda joba boıynsha qarjylandyrý negizdemesi bekitý satysynda ekenin málimdedi.
Atap aıtqanda, elektrovelosıpedter men qosymsha jabdyqtarǵa qoıylatyn tehnıkalyq talaptar aıqyndalyp, baǵdarlamalyq qamtamasyz etýge arnalǵan tehnıkalyq negizdeme ázirlenip jatyr.
Bıýdjet pen qarjylandyrý kózderi atalǵan jumystar aıaqtalǵannan keıin anyqtalady.
— 2 myń elektrovelosıped satyp alý josparlanyp otyr. Qurylǵylardy óndirýshi el men jetkizýshi uıym qoldanystaǵy zańnamaǵa sáıkes memlekettik satyp alý portalynda ashyq konkýrs nátıjesinde aıqyndalady, — delingen mekeme jaýabynda.
Sonymen qatar «Almaty Parkıng» málimetine sáıkes, jańa velosıpedterdi qoıý úshin burynǵy Almaty Bike-ta sekildi arnaıy stantsııalar jasalmaıdy.
— Turaq úshin mobıldi qosymsha kartasynda kórsetiletin arnaıy belgilengen turaq aımaqtary (geopozıtsııa) jetkilikti, — dep habarlady mekemeden.
Odan bólek kommýnaldy elektrovelosıpedterdi jalǵa berý júıesiniń jańa jobasy aıasynda naqty qoldaný ýaqytyna negizdelgen mınýttyq tólem júıesi engizilmek.
ıAǵnı, elektrvelosıpedke mingen azamat ony qoldanǵan mınýtyna qaraı tólem jasaıdy. Qazirgi ýaqytta elektrsamokattarda osyndaı júıe qoldanylady.
— Mundaı tásil qysqa qashyqtyqqa sapar shegetin paıdalanýshylar úshin, sondaı-aq kólik quralynyń osy túrin synap kórýge nıetti azamattar úshin qolaıly ári únemdi bolmaq, — delingen jaýapta.
Eske salaıyq, búgingi kúni Almaty qalasynda 89 shaqyrym veloınfraqurylym bar. Onyń ishinde: velojolaqtar — 25 km, velojoldar — 63,8 km.
Almaty Bike nege qaıta iske qosylmady?
Buǵan deıin megapolıste Almaty Bike velosıpedterdi jalǵa berý qyzmeti nelikten toqtap qalǵanyn jazǵanbyz.
2024 jyly Almaty Bike jumysyn qamtamasyz etý úshin Qalalyq mobıldilik basqarmasy memlekettik satyp alýǵa 3 konkýrs ótkizgen.
Alǵashqy eki baıqaý qyzmet kórsetýshilerdiń bolmaýyna baılanysty toqtatylǵan.
Al úshinshi konkýrstyń qorytyndysy boıynsha jeńimpaz bolyp «Geo Proekt Injınırıng» JShS anyqtalyp, 4 qazan kúni qyzmet kórsetýge shart jasalǵan.
Alaıda keıin atalǵan uıymmen jasalǵan shartty jaramsyz dep taný týraly Almaty qalasynyń mamandandyrylǵan aýdanaralyq ákimshilik sotyna talap-aryz joldanyp, sot talqylaýy ótti.
Eske salaıyq, buǵan deıin Almatyda bıyl qansha shaqyrym velojol salynatynyn jazǵanbyz.
