Almatyda eki sýburqaq qala menshigine beriledi
ALMATY. KAZINFORM - Megapolıste «Almaty Jazy» qalalyq aktsııasy aıasynda qalalyq sýburqaqtar tazartylyp, jýylyp, jańartylyp jatyr.
Almaty ákimdiginen málim etkendeı, qazir kommýnaldyq menshiktiń balansyndaǵy 66 sýburqaqtyń 60-y retke keltirildi, qalǵan altaýy jańǵyrtylý ústinde.
Jeke aýmaqta ornalasqan sýburqaqtar da tazartyldy. Elektr aspaptarynyń, jaryqtandyrýdyń, qondyrmalar men búrikkishterdiń jumysy boıynsha sýburqaq jabdyǵyna tekserý júrgiziledi.
«Aýdandyq ákimdikter men «Eco Almaty» JShS júrgizetin túsindirý jumystary aıasynda jeke sýburqaqtarǵa tıisti jaǵdaıda turaqty tehnıkalyq qyzmet kórsetý jáne kútip ustaý qajettiligi týraly máseleler belsendi talqylanady. Jeke sýburqaqtardy kommýnaldyq menshikke berý múmkindigine erekshe nazar aýdarylǵan. Bul olardyń turaqty jumys isteýin jáne qalalyq ortany jaqsartýdy qamtamasyz etýge múmkindik beredi», - dedi «Eco Almaty» JShS ókili Jánibek Kenjalıev.
Aıtýynsha, jeke aýmaqta ornalasqan sýburqaqtardyń basym bóliginiń jaǵdaıy máz emes, qaraýsyz qalǵan, jumys istemeıdi nemese kúrdeli jóndeýdi qajet etedi. Júrgizilgen túsindirý jumystarynyń nátıjesi boıynsha eki jeke sýburqaqtyń ıesi – «Sháken Aımanov atyndaǵy «Qazaqfılm» ulttyq kınostýdııasy» AQ jáne «Stolıchnyı» TÚK nysandaryn kommýnaldyq menshikke berýge daıyn ekendikterin jetkizdi.
Almatyda barlyǵy 150 sýburqaq bar, onyń ishinde 66-sy kommýnaldyq jáne 84-i jeke aýmaqta ornalasqan. «Almaty Jazy» naýqany aıasynda jeke sýburqaqtar qalalyq nysandarmen qatar retke keltiriledi.
Osyǵan deıin «Qazaqstan» qonaq úıiniń janyndaǵy sýburqaqtaǵy jóndeý jumystary toqtatylyp, ony jańartpaq bolǵan meımanhana ıesi jaýapqa tartylǵan edi.
Eske salaıyq, Almatyda sýburqaqtar maýsymy birinshi mamyrda ashyldy.
