Almatyda ehınokokkoz aýrýy beleń ala bastady
Almaty qalasynda ehınokokkoz aýrýy ótken jylmen salystyrǵanda 7,5 paıyzǵa ósti. Jyl basynan beri juqpaly aýrýdyń 17 deregi tirkelgen, dep habarlaıdy Kazinform.
Almaty qalasynyń sanıtarııalyq-epıdemıologııalyq baqylaý departamentiniń málimetinshe, qalada ehınokokkoz aýrýyna qatysty nashar ahýal qalyptasyp otyr. Aýrý juqtyrǵandardyń 15,7% paıyzy – 14 jasqa deıingi balalar.
«Ehınokokkoz – sozylmaly aǵymymen, aǵzanyń allergııasymen jáne baýyrdyń, ókpeniń jáne basqa múshelerdiń zaqymdanýymen sıpattalatyn parazıttik aýrý, onda kóptegen kıstozdy túzilister qalyptasady, olar múgedektikke nemese asqynǵan jaǵdaılarda ólimmen aıaqtalady», - deıdi Almaty qalasynyń sanıtarııalyq-epıdemıologııalyq baqylaý departamenti basshysynyń orynbasary Ásel Qalyqova.
Aıtýynsha, aýrýdyń qozdyrǵyshy – gelmınt Echinococcus granulosus. Ehınokokkozdyń qaýiptiligi — uzaq ýaqyt boıy belgilersiz 5 jyldan 20 jylǵa deıin nemese odan da kóp ýaqytqa sozylýy múmkin ekendiginde.
«Baýyr, ókpe jáne basqa da ishki organdarǵa enip, qurylym túzetin qurttardyń áserinen bolatyn sozylmaly aýrý, negizinen, ıtten juǵady. Odan malǵa, sonyń etimen adamǵa juǵýy da múmkin. Sol sebepti úıdegi janýarlardy veterınarlarǵa turaqty qaratyp turý qajet. Ehınokokkoz qozdyrǵyshtarynyń adamǵa jabaıy ańdardan juǵatyn jaǵdaılary da kezdesedi», - deıdi ol.
Mamanyń sózinshe, parazıt ókpede bolǵan kezde entigý, qan túkirý, keýdeniń aýyrsynýy, jótel paıda bolady.
«Ehınokokkoz dıagnozy zerthanalyq jáne aspaptyq zertteý ádisterin (ýltrodybystyq zertteý, rentgenografııa, kompıýterlik tomografııa) qoldaný arqyly anyqtalady. Ehınokokkozdy emdeý tek hırýrgııalyq ádispen júzege asyrylady. Emdeýden keıin ehınokokkozben aýyratyn naýqastar dıspanserlik espke alynady», - dep túsindirdi Ásel Qalyqova.
