Almatyda burynǵy temirjol aýrýhanasynan órt shyqty

ALMATY. KAZINFORM — Almatyda Abaı men Masanshy kósheleriniń qıylysynda ornalasqan burynǵy temirjol aýrýhanasynda ot tutandy.

Qalalyq TJD málimetinshe, kóp jyldar qaraýsyz turǵan ǵımarattyń ekinshi qabatynda qoqys órtengen.

— 1 shilde kúni keshki saǵat 19:00-de Almaty TJD órt sóndirýshileri Almaly aýdany Masanchı kóshesine jiberildi. Kelgen sátte jumys istemeıtin temirjol aýrýhanasynyń eki qabatty ǵımaratynyń 2-qabatynda qoqys janǵan. Órt 10 mınýttyń ishinde sóndirildi, — dep habarlady TJD baspasóz qyzmeti.

Eske salaıyq, buǵan deıin qaraýsyz qalǵan temir jol aýrýhanasynda 2024 jyldyń qazan aıynda jóndeý jumystary bastalatynyn jazǵan edik.