Almatyda BRT jolaqtary qashan salynatyny belgili boldy
ALMATY. KAZINFORM – Qala ákimdigi jyl basynda «Almaty qalasynyń 2030 jylǵa deıingi kólik qańqasynyń» sheberlik-josparyn bekitken bolatyn. Joba aıasynda bıyl Raıymbek dańǵylynda BRT jolaǵyn salý josparlanǵan.
Almaty qalasy ákimdiginiń málimetine sáıkes, shahardyń negizgi kósheleriniń biri – Raıymbek dańǵylynda BRT jolaqtaryn salý jumystary shilde-tamyz aıynda bastalady. Bekitilgen jospar boıynsha burynǵy «Tashkentskıı» kóshesiniń boıynda jalpy avtobýs jolaǵynyń uzyndyǵy 17 km bolmaq. Degenmen osy jyly Raıymbek dańǵylynyń boıymen Pýshkınnen Ahmetov kóshesine deıin 8 shaqyrym júrgizý josparlanǵan. BRT aralas jolaqpen júrgiziledi, ıaǵnı kósheniń bir bóliginde avtobýs jolyna shetki sol jaǵy berilse, keı bóliginde shetki oń jaǵyna salynady.
Almaty qalasy Mobıldilik basqarmasynyń basshysy Saǵyndyq Telibaev kólik qańqasynyń sheberlik-josparyn tanystyrý kezinde megapolıste endi qoǵamdyq kólikke basymdyq beriletinin atap ótken bolatyn.
«Osy joba aıasynda avtomattandyrylǵan baǵdarshamdar ornatý aldyn ala qaralǵan. Qazirgi kezde Raıymbek dańǵylynda qoǵamdyq kólik te, jeke avtomobılder de kepteliste turady. Eshkimge basymdyq berilmegen. Sondyqtan biz birtindep qoǵamdyq kólikke basymdyq bermekpiz. Adamdar jeke kóligine qaraǵanda avtobýspen tezirek jetetinin baıqasa, qoǵamdyq kólikti paıdalanýshylar kóbeıedi. Al kólikterdiń azaıýy ekologııaǵa paıdasyn tıgizedi», - dedi basqarma basshysy.
Almatynyń sheberlik-josparynda qaladaǵy kólik qozǵalysynyń 40%-yn qamtıtyn shahar shekarasyndaǵy negizgi 10 baǵyt kórsetilgen. Bul baǵyttar boıynsha kúnine 310 myńǵa jýyq kólik qalaǵa kirip-shyǵady. Onyń ishindegi eń úlken kólik aǵyny Almatynyń batys bóliginen kelip, Raıymbek dańǵylynyń boıynan ótedi. «Tashkent traktinen» kúnine 54 myń kólik keletin kórinedi. Osyǵan oraı, Raıymbek dańǵylynyń boıynda BRT jolaqtarynyń salynýy jolaýshylardyń qoǵamdyq kólikke aýysýy áserinen kólik aǵynyn azaıtýy múmkin. Qazirgi ýaqytta orta eseppen jeke kólik arqyly qalaǵa 2 (1,7) adam keletin bolsa, avtobýs arqyly 35 jolaýshy dittegen jerine jetip otyr. Sondaı-aq qalanyń shyǵys jáne batys baǵyttaryn baılanystyratynyn Raıymbek dańǵylynda 88 marshrýt boıynsha 1300-den astam avtobýs júredi jáne kún saıyn 730 myńǵa jýyq jolaýshyǵa qyzmet kórsetedi. Jolaýshylar tasymaly kásiporyndary qaýymdastyǵy tóraǵasynyń orynbasary Dana Ahatova BRT qurylysy qoǵamdyq kóliktegi jolaýshylardyń kóbeıýine ákeletinin aıtady.
«Qalanyń avtobýs marshrýttarynyń 40%-dan astamy Raıymbek dańǵyly arqyly júredi. Bul atalǵan ınfraqurylymnyń qoǵamdyq kólik úshin mańyzdylyǵyn kórsetedi. Raıymbek dańǵylyna BRT engizý qoǵamdyq kóliktiń tartymdylyǵyn arttyrýdy kózdeıdi. Bul óz kezeginde halyqty qoǵamdyq kólikke otyrýǵa yntalandyrýǵa tıis», – dedi Jolaýshylar tasymaly kásiporyndary qaýymdastyǵy tóraǵasynyń orynbasary.
Aıta keteıik, «Almaty qalasynyń 2030 jylǵa deıingi kólik qańqasynyń» sheberlik-jospary aıasynda qala kólik qańqasynyń 81%-yn BRT-dan qurý josparlanǵan. Barlyǵy 2030 jylǵa deıin Almatyda uzyndyǵy 296 km BRT jolaǵy salynady.
