Almatyda bıyl bas shyrshanyń shamy qashan jaǵylady

ALMATY. KAZINFORM – Almatyda Jańa jyl meıramyna daıyndyq bastaldy. Qarasha aıynda-aq qalanyń ár aýdanynda kelesi aıda kósheler men alleıalardy bezendirý úshin daıyndyq jumystary júrgizilip jatyr.

Almatynyń jańajyldyq bas shyrshasy burynǵydaı Respýblıka saraıynyń janynda (Abaı-Dostyq qıylysy) ornatylady.

– Qalanyń bas shyrshasy 18 jeltoqsanda Abaı alańynda jaǵylady. Sonymen qatar Medeý aýdanyndaǵy jańajyldyq shyrshany jaǵý rásimi Panfılovshylar saıabaǵynda ótedi. Naqty kúni men ýaqyty kelisim boıynsha anyqtalady, - dep habarlady Almatynyń Medeý aýdany ákimdigi.

Memlekettik satyp alý veb-portalynda júrgizilgen ashyq konkýrs nátıjesi boıynsha jeńimpaz anyqtalyp, Medeý aýdany ákimdigi tıisti qyzmetterdi kórsetýge kelisimshart jasasqan. Merdiger der kezinde anyqtalǵandyqtan, shamamen 40 mln teńge únemdelip, kelisimsharttyń jalpy somasy 160 mln teńge bolǵan.

– Aýdannyń jańajyldyq bezendirilýi bekitilgen josparǵa jáne bólingen bıýdjet sheńberinde júzege asyrylady. Buǵan deıin satyp alynǵan áshekeıler qaıta qoldanylady. Bıyl qolda bar dekor elementterin qalpyna keltirip, olardy merekelik bezendirý kezinde paıdalaný josparlanǵan, - dep habarlady Medeý aýdany ákimdigi.

Almatynyń Túrksib aýdany ákimdiginiń habarlaýynsha, bıyl aýdannyń jańajyldyq bezendirilýine jergilikti bıýdjetten QQS-ty qosa eseptegende 200 mln teńge bólingen.

– Qazirgi ýaqytta merdiger uıymdy anyqtaý úshin konkýrs ótip jatyr. Tehnıkalyq erekshelikke sáıkes, aýdan aýmaǵyndaǵy túrli lokatsııada jańajyldyq áshekeılerdi montajdaý, bólshekteý jáne shyǵarý jumystaryn konkýrs jeńimpazy oryndaıdy. Byltyrǵy materıaldar qaıta qoldanylady, - dep habarlady Túrksib aýdany ákimdigi.

Eske salaıyq, buǵan deıin Naýryzbaı aýdanynda merekelik bezendirýge 92,3 mln teńge qarastyrylǵanyn jazǵan edik.