Almatyda Baraholka bazarynan taǵy da órt shyqty

ALMATY. KAZINFORM - Almatyda “Baraholka” bazarynyń Jetisý aýdany aýmaǵynda ornalasqan bóliginde órt shyqty. Qalalyq TJD málimetine sáıkes, órt sóndirýshiler 13:26-da jalynmen kúresýge kirisken. Al 13-50-de órt oqshaýlanǵan.

Tótenshe jaǵdaılar departamentiniń tehnıkasy órt bolǵan aýmaqqa birden jete almaǵan. Sebebi bazar aýmaǵynda retsiz qoıylǵan kólikter arnaıy tehnıkaǵa kedergi keltirdi.

«Almaty qalasy TJD kúshteri men quraldary Jetisý aýdany bazarynyń aýmaǵynda oryn alǵan joǵary dárejedegi shaqyrtý boıynsha órt sóndirý jumystaryn júrgizdi. Órtke qarsy oqpandar órt ornyna úzdiksiz sý berip, kórshiles salynǵan qoıma úı-jaılaryn qorǵaýǵa baǵyttaldy. Órt 13:50-de oqshaýlandy. Qoıma úı-jaılardan taýar men materıaldyq qundylyqtar evakýatsııalandy. 14:13-te órt tolyǵymen joıyldy», - dep habarlady TJD baspasóz qyzmeti.

Eske salaıyq, bıyl shilde aıynda «Baraholkanyń» «Mızam» bazary órtengen bolatyn. 

Sondaı-aq aqpan aıynda «Baraholka» bazaryndaǵy qoımanyń órtengenin jazǵanbyz.