Almatyda balalar arasynda týberkýlez aýrýy kóbeıgen

ALMATY. KAZINFORM – Almatyda byltyr 14 jasqa deıingi balalar arasynda týberkýlezdiń 23 jaǵdaıy anyqtaldy, bul 2022 jylmen salystyrǵanda 36,7%-ǵa kóp. Bul týraly qalalyq sanıtarlyq-epıdemıologııalyq baqylaý departamentiniń basshysy Qasymhan Alpysbaıuly málim etti.

«2023 jyly 14 jasqa deıingi balalar arasynda týberkýlezben syrqattaný 36,7%-ǵa ósýi baıqalady. 100 myń bala sanyna shaqqanda kórsetkish 4,1-di qurady. 2022 jylyǵy syrqattaný kórsetkishi – 3,0», - deıdi departament basshysy.

Aıtýynsha, jalpy týberkýlez boıynsha epıdemıologııalyq jaǵdaı turaqty, 2022 jyldyń sáıkes kezeńimen salystyrǵanda týberkýlezben syrqattaný 3,6%-ǵa tómendegen.

«Týberkýlez ınfektsııasynyń negizgi juǵý joly – aýa arqyly. Naýqas adamnyń jótelý kezinde qaqyryqtyń (silekeı) asa kishkentaı, kózge kórinbeıtin, 2 metrge deıingi qashyqtyqqa taralatyn erekshe «aerozolder» paıda bolady. Naýqas kúnine 7 mıllıardqa deıin týberkýlez taıaqshalaryn aerozol túrinde qorshaǵan ortaǵa shyǵarady, olardyń keıbireýleri edenge nemese jerge túsip, uzaq ýaqyt saqtalady», - dep atap ótti Qasymhan Alpysbaıuly. 

Týberkýlez aýrýynyń negizgi klınıkalyq belgileri: dene qyzýynyń 37,5 S kóterilýi, álsizdik, tershendik (ásirese túnde), tábettiń bolmaýy; salmaq tastaý, keýde qýysynyń aýrýy.