Almaty áýejaıyndaǵy kúdikti buǵan deıin avtobýsta qyzdy urǵan

ALMATY. KAZINFORM - Almaty áýejaıynda qyzdy kepilge alǵan kúdikti buǵan deıin de jaýapkershilikke tartylǵan. 

Almaty polıtsııasy búgin áýejaıda ustalǵan kúdikti buǵan deıin avtobýstaǵy qyzdy urǵan adam ekenin rastady. Byltyr bolǵan oqıǵadan soń kúdiktige bir jylǵa bas bostandyǵyn shekteý jazasy taǵaıyndalǵan.

— Qoǵamdyq kóliktegi oqıǵadan keıin Almaly aýdandyq polıtsııa bólimi qylmystyq is qozǵady. Kúdikti ustalyp, ýaqytsha ustaý ızolıatoryna qamaldy. Sotqa deıingi tergeý aıaqtalǵannan keıin qylmystyq is materıaldary sotqa joldandy. Ótken jyldyń jeltoqsan aıynda sot er adamdy bir jylǵa bas bostandyǵyn shekteý jazasyna kesken, - dep habarlady departamentten.

Eske salaıyq, byltyr qarasha aıynda qoǵamdyq kólikte áıeldi urǵan 66 jastaǵy jergilikti turǵyn ustalǵanyn jazǵan edik.

Búgin kúdikti Almaty áýejaıynda qyzdy kepilge alyp, kópshilik aldynda pyshaq kezendi.