Almatyda alıment bereshegi 1,5 mlrd teńgeden asty

ASTANA. KAZINFORM – Almaty qalasynyń Almaly aýdanynda JSO-nyń oryndaýyndaǵy atqarýshylyq is júrgizýdegi alıment boıynsha bereshek somasy 1,5 mlrd teńgeden asty.

Tekserý nátıjesinde kóptegen boryshker avtokólikteri men jyljymaıtyn múlikteriniń bolýyna qaramastan, sot sheshimderin oryndaýdan sanaly túrde jaltaratyny anyqtaldy.

Osyǵan baılanysty prokýratýranyń bastamasymen qalanyń polıtsııa departamentimen birlesken jumys uıymdastyryldy.

— Qabyldanǵan sharalardyń nátıjesinde boryshkerlerdiń 22 avtokóligi ustalyp, aıyppul turaǵyna qoıyldy. Bes is boıynsha múlik alynǵannan keıin 7 mıllıon teńgeden astam qaryz tolyǵymen óteldi. Óndirilgen qarjynyń jalpy somasy 74 mln teńgeden asty. Jasalǵan zańbuzýshylyqtar úshin eń qasaqana jaltarǵandar jaýapqa tartyldy, sonyń ishinde qylmystyq jaýapkershilikke de. Olardyń bireýi Qylmystyq kodekstiń 139-babyna sáıkes kináli dep tanylǵan: ol sot sheshimin qasaqana oryndamaǵan jáne kirisin jasyrǵan, nátıjesinde 11 mıllıon teńgeden astam qaryz bolyp shyqty, — delingen Almaty qalasynyń prokýratýrasy taratqan habarlamada.

Oǵan probatsııalyq baqylaýmen bas bostandyǵyn shekteýge bir jyl jaza berildi. 

Aıta ketelik sot oryndaýshylar jarty jylda 18 mlrd teńgeden astam alıment óndirdi.