Almatyda Abaıdyń 180 jyldyǵy qalaı atap ótiledi

ALMATY. KAZINFORM – Almatyda Abaı Qunanbaıulynyń 180 jyldyǵyna oraı 120-dan astam is-shara ótedi.

Almaty ákimdiginiń málimetinshe, qalada qazaqtyń uly aqyny, oıshyl ári aǵartýshy Abaı Qunanbaıulynyń 180 jyldyǵyna arnalǵan aýqymdy baǵdarlama bastaldy. Olardyń qatarynda – teatr qoıylymdary, poezııa keshteri, ádebı saǵattar, kórmeler, kontsertter, jastarmen kezdesýler, sondaı-aq sporttyq, qaıyrymdylyq jáne aǵartýshylyq aktsııalar bar.

Mereıtoıdyń basty saltanaty 10 tamyzda – Abaıdyń týǵan kúninde ótedi. Saǵat 10:00-de Respýblıka saraıynyń aldyndaǵy Abaı alańynda uly aqynnyń eskertkishine gúl shoqtaryn qoıý rásimi ótedi. Al saǵat 12:00-de dál osy alańda «Alashtyń Abaıy» atty mýzykalyq-dramalyq kontsert uıymdastyrylady. Odan bólek is-sharalar qalanyń barlyq 8 aýdanynda ótedi.

Sonymen qatar 10 tamyz kúni 10:00-de Mahatma Gandı atyndaǵy saıabaqta №4 kitaphana-fılıal «Júregimniń túbine tereń boıla» atty art-kompozıtsııa ótkizedi.

28 tamyz kúni saǵat 19:00-de Respýblıka saraıynda «Abaıǵa taǵzym» atty merekelik kontsert ótedi. Qoıylym Abaıdyń rýhanı jolyn mýzyka, teatr jáne bıdi biriktire otyryp sahnalaıdy.

Qyrkúıek aıynda Memlekettik qýyrshaq teatrynda «Men bir jumbaq adammyn… Abaı» spektakliniń premerasy ótedi. Qoıylym Muhtar Áýezovtiń «Abaı joly» romany men «Qara sózderi» negizinde sahnalanyp, aqynnyń ishki jan dúnıesin, parasaty men rýhanı tereńdigin ashady.

Eske salaıyq, buǵan deıin Almatyda 10 tamyz kúni Abaıdyń 180 jyldyǵyna oraı birneshe kóshe jabylatynyn jazǵanbyz.